Di mundial cunter drogas - La pulvra alva en il «Stadtpark» da Cuira

Sco en l'entira Svizra pon ins era en il Grischun vesair ils davos onns in augment cuntinuà da consuments da la pulvra alva. Suenter alcohol e cannabis è il cocain la droga che vegn consumada il pli bler, quai che ha er da far cunquai che la droga vegn consumada da tuttas classas socialas. Quest augment dal consum da cocain ha cunzunt da far cun la crudada dal pretsch.

Scena da drogas averta en il «Stadtpark»

La pulvra alva vegn era consumada considerablamain dapli en il parc da la citad a Cuira. Quel parc è atgnamain adina stà in lieu da sentupada per persunas a l'ur. Avant dus onns è il parc tuttavia vegnì revitalisà per carmalar er autra glieud en quest lieu. Tuttina è il parc er oz anc il lieu da scuntrada per dependents da drogas en il Grischun e pli frequentà che avant in pèr onns.

Tge èn ils gronds problems?:

• stadi da sanadad è critic; per exempel sche persunas inizieschan a sa sez las drogas, po quai manar tar abscess ed infecziuns bacterialas
• i vegn tar problems tranter ils consuments, l'agressiun s'augmenta
• nova glieud chatta la via tar las drogas che vegnissan uschiglio betg en contact
• l'entira illegalitad vegn publica – maina tar problems giuridics u problems cun la polizia

«La gronda part vul viadora»

La manadra da l'ambulatori dal servetsch psichiatric grischun, Margrith Meier manegia ch'i fiss uras da tgirar meglier ils dependents en il parc da la citad a Cuira. I fiss uras da tgirar las persunas al lieu; da metter là persunas scoladas che van en sin las persunas a l'ur, ch'emprovan da vegnir cun ellas en in dialog, da sclerir lur basegns e da chattar communablamain soluziuns co ch'ins savess vegnir or da quella situaziun. Perquai che la gronda part dals dependents vul viador, vul dumagnar ord la dependenza. Da quai è Margrith Meier persvadida.

RR actualitad 07:00