La regenza duai rinforzar marcantamain las mesiras cunter la criminalitad liada a l’acquisiziun da drogas a Cuira. Quai pretenda l’incumbensa da la deputada da la PPS en il Cussegl grond, Sandra Adank. Plinavant duai era la lescha vegnir adattada uschia che las autoritads da persecuziun penala survegnian dapli mezs.
Regenza accepta cun resalvas
La regenza da sia vart accepta l’incumbensa cun intginas midadas. Uschia duai la repressiun vegnir rinforzada a moda persistenta – sche necessari cun resursas persunalas supplementaras – senza però indeblir la prevenziun, la terapia e la reducziun dals donns.
