Che Cuira ha ina scena da drogas averta n'è nagin secret. La situaziun vegnia dentant en plirs secturs adina pli precara, tenor cussegl da la citad Cuira Patrik Degiacomi. Cun in local da consumaziun vegnia ins da controllar meglier il traffic pitschen cun drogas e il consum.
Perquai vul la citad gia avrir in local da consumaziun l'enviern. Cura exact e nua che quel vegnia avert, è anc betg enconuschent.
Dapli agressivitad pervia d'autras drogas
Il Stadtgarten da Cuira fiss atgnamain in lieu d'inscunter. Blers eviteschan dentant quel – auter che sch'i tschertgan las drogas. Gia dapi onns datti là in'uschenumnada scena da drogas averta.
Il trend da consumar va envers cocain ubain «base». Quai è ina maschaida da cocain ed amoniac. Atras quai è l'effect pli intensiv. Fertant che heroin ha in effect sedativ, pia calmant, ha cocain l'effect cuntrari. Persunas èn pli aggressivas, pli directas, cun pli paucas retegnientschas.
Il resultat da quai è in'atmosfera adina pli aggressiva en il Stadtgarten. Plinavant crescha era la criminalitad. Il 2022 hai dà a Cuira 3'662 delicts criminals. Quai èn 43% dapli che l'onn avant. La Polizia chantunala declera quest augment, sper las cundiziuns urbanas, era cun dapli persunas ch'engolan per pudair finanziar lur consum da drogas.
Per la polizia na saja la situaziun er betg simpla. Quai ha ditg Andri Müller, responsabel per las inquisiziuns tar la polizia criminala. Persunas arrestadas possian els mo tegnair 24 resp. 48 uras en arrest.
Local da consumaziun sco part da la soluziun
Dapi ditg è in local da consumaziun – in uschenumnà «Fixerstübli» – en discussiun. En uschè in local pudessan persunas dependentas consumar sut cundiziuns pli controlladas ed igienicas. Uschia capitass la consumaziun sut cundiziuns meglras ed ins haja dapli access a las persunas per surmanar ellas ad ina terapia, manegia Margreth Meier. Ella è la manadra da l'ambulatori «Neumühle» – il post da consegna da heroin che tutga tar ils sevezzans psichiatrics dal grischun.
Jau speresch ch'il local da consumaziun gida a sbassar l'aggressiun.
Er las experientschas or dal project da «streetwork» en il Stadtpark haja mussà ch'uschè in local saja necessari. Experientschas en autras citads sajan bunas. Er Elia, ch'è dapi onns dependent, manegia ch'en uschè lieus saja la situaziun savens pli quietta.
Il local da consumaziun na schlia dentant betg tut ils problems, uschia Margreth Meier. Senza mesiras ulteriuras, sco per exempel surmanar las persunas ad ina terapia, na vegnia betg ad ir.
Citad vul, chantun fraina
Plirs projects per meglierar la situaziun datti gia. Uschia ha la citad da Cuira lantschà l'onn 2019 il project da streetwork. Il 2021 ha er la regenza grischuna decis da meglierar la situaziun. Il Cussegl grond ha deliberà ils meds finanzials da 400'000 francs per 2022. Per il temp da 2023 fin 2025 èn prevesids 500'000 fin 600'000 francs.
Il cussegl communal da Cuira ha avant in onn gia ditg Gea ad in local da consumaziun. Ils custs per il project da pilot sur trais onns sajan tar 1'080'000 francs. Suenter ils trais onns project da pilot saja il giavisch, ch'il chantun surpiglia il local da consum, ha ditg il cusseglier da la citad Patrik Degiacomi.
Per Marcus Caduff n'è uschia in local dentant betg la suletta soluziun per il problem da criminalitad. «La droga stoni anc adina cumprar sez», di il manader dal Departament d'economia e fatgs socials. Ed el chattia in zic ironic ch'il stadi scumondia las drogas, mettia dentant a disposiziun in lieu per consumar ellas.
Quai vesa era Patrik Degiacomi uschia. El è dentant persvas da dumagnar sut controlla il consum ed il commerzi en la publicitad. Omadus èn da l'avis che la situaziun dovra in pachet da mesiras e quellas sajan en process da furmaziun.
