En il rom da l'uschenumnà Green Deal ha la regenza grischuna preparà il messadi da la lescha latier. Quella lescha fa part da la segund'etappa dal Green Deal. Il Cussegl Grond sa fatschenta en la sessiun d'avrigl cun quella.
La finamira dal Green Deal è ch'il Grischun cuntanschan enfin il 2050 netto nulla emissiuns da CO2. Enfin lura vai per custs supplementars da 1,8 milliardas francs, 1 milliarda stuess il chantun Grischun surpigliar.
Segund'etappa: basa legala per cuntinuar
Per realisar la segund'etappa dal Green Deal èsi necessari d'adattar las premissas legalas e d'adattar la finanziaziun. Concret na vul il chantun betg be cuntinuar cun las mesiras gia existentas sco per exempel sustegn finanzial per sanar bajetgs, mabain da nov er promover indrizs da chargiar autos electrics tar chasas da pliras famiglias. Er èsi previs da promover indrizs fotovoltaics vid chasas che produceschan dapli energia che quai che las chasas dovran. Tenor il messadi da lescha vul il chantun er promover purschidas da furmaziun supplementara en quest connex.
Per finanziar las mesiras supplementaras propona la regenza da duvrar 200 milliuns francs da l'agen chapital dal chantun. Vitiers prevesa ella da duvrar daners da la LSVA – la taxa sin il traffic da camiuns pesants, dependenta da la prestaziun – ed ina part dals gudogns che vegnan tut tenor da la Banca naziunala svizra. Evitar vul la regenza grischuna augments da taglias per la segund'etappa dal Green Deal.
