Il Cussegl grond ha concedì in credit da stgars 68 milliuns francs en il rom dal Green Deal. Tranter auter duain quels daners ir en il traffic public u en edizifis effizients puncto energia. La finamira dal Green Deal è ch'il Grischun cuntanscha fin il 2050 netto nulla emissiun da CO2. Ils stgars 68 milliuns francs èn in'emprima etappa dal plan d'acziun per il clima. Enfin il 2050 vai per totalmain 1,8 milliardas francs.
Plinavant ha il Cussegl grond decidì davart in fondo da clima ch'è en emprima lingia ord facultad dal chantun. In augment da taglia duai per finanziar l'entir plan dal clima duai pir vegnir en dumonda sco ultima ratio.
Bler laud per il Green Deal – discussiuns pervia la finanziaziun
En il Cussegl grond èsi gia stà cler en la debatta d'entrada: I dovra mesiras per far frunt a la midada dal clima. Mo singulas vuschs han mess en dumonda il plan da la regenza. Uschiglio hai dà bler laud per la lavur da la regenza e da la cumissiun ch'ha preparà la fatschenta. E quai è er sa mussà suenter la debatta d'entrada, cun ina gronda maioritad da 99 tar 2 vuschs èn deputadas e deputads entrads en la fatschenta.
I n'è betg vegnì construì in chastè en l'aria u skizzà ina utopia. Igl è vegnì mussà cun blera lavur che nus en il Grischun pudain cuntanscher netto nulla emissiuns.
Il Green Deal mettia il Grischun en ina buna posiziun per cuntanscher la finamira da netto nulla CO2 fin il 2050. Per dumagnar quai vegnan quatter secturs mess en il center: agricultura, traffic, bajetgs ed industria. Aifer mintgin da quels èn vegnids creads pachets da mesiras. Cun quai plan èn las partidas burgaisas sco er la sanestra cuntentas. Sulet la PPS na va betg d'accord cun il Green Deal.
Nus na tutgain betg tar ils sceptichers da clima ed essan da l'avis ch'i dat la midada dal clima e ch'i dovra mesiras, dentant betg exnum en questa furma.
Tenor la PPS sajan ins bain d'accord ch'i dovria mesiras per far frunt a la midada dal clima, dentant betg en furma dal Green Deal. Perquai ha ella vulì renviar la fatschenta a la regenza. Quella proposta n'ha dentant gì negina schanza – ella è vegnida refusada cun 92 tar 14 vuschs.
