Ina nova analisa da l'institut per la perscrutaziun da naiv e lavinas SLF mussa tge consequenzas che la midada dal clima vegn ad avair sin la situaziun da lavinas en Svizra enfin la fin da quest tschientaner (2100). Pli pauca naiv na muntia numnadamain betg pli paucas lavinas. Cun la midada dal clima vegnia en l'avegnir a dar adina dapli lavinas da naiv bletscha l'enviern – quai che portia novas sfidas.
Il dumber da lavinas sitgas vegn a sa reducir, ma sur il cunfin dal guaud vegn l'augment da lavinas da naiv bletscha ad egualisar per part questa sminuziun.
La perscrutadra dad SLF Stephanie Mayer ha intercurrì tge consequenzas che la midada dal clima vegn ad avair sin l'activitad da lavinas sur 1'800 meters sur mar.
Novas sfidas per ils territoris da skis
Per ils territoris da skis ed ils servetschs da segirtad da lavinas vegnia quai a dar novas sfidas en l'avegnir. Il problem saja ch'ils servetschs da segirtad da lavinas na vegnian strusch a pudair siglientar questas lavinas bletschas, cuntrari a lavinas sitgas.
Sco mesira da segirezza gida mo da serrar las pistas periclitadas d'in territori da skis.
Er sportists da temp liber duessan s'occupar pli intensivamain cun il tema lavinas da naiv bletscha, di Mayer, perquai che quellas daventan pli frequentas durant l'enviern.
Mayer ha perscrutà set lieus en Svizra, tranter auter il Weissfluhjoch sur Tavau ed ina staziun sin circa 2'700 meters tar Zermatt. Ella è dentant segira che ses resultats pon vegnir transferids sin tut il territori alpin. Medemamain sin chadainas da muntognas cun relaziuns climaticas sumegliantas, sco per exempel ils Columbia Mountains en il Canada.
La buna nova: Pervia da las temperaturas creschentas, vegnan las lavinas pli darar a cuntanscher la val en il futur, cunquai ch'il cunfin da naiv vegn ad esser bler pli aut, sco er ch'i vegnia en general a dar damain naiv. Quai na vala dentant betg da princip. Pertge eveniments da naiv extrems vegni er a dar en l'avegnir, èsi scrit vinavant en l'analisa dal SLF. Oravant tut en regiuns autas pudess quai schizunt chaschunar lavinas pli grondas. Sche las lavinas rumpian en ils auts e sa chanaliseschan, lura possian las lavinas tuttina anc cuntanscher la val, sco ozendi.
Mayer spetga dentant che las autoritads examineschian lur chartas da privel ed adatteschian quellas a la situaziun da privel che sa midia pervia da la midada dal clima.
Or da l'archiv:
