La Svizra è anc lunsch davent d'ademplir la cunvegna da Paris davart il clima. Quai vala era per il Grischun. Tenor la glista da rangaziun dal WWF è il Grischun be sin plazza 15. Las contribuziuns da promoziun da l'emprima etappa dal «Green Deal» mussian entant effect.
Ils bajetgs sajan vegnids pli effizients ed i vegnia producì dapli energia or da funtaunas regenerablas. En quests dus secturs dettia impuls dal chantun che tutgian tar ils pli auts en Svizra. Ma tuttina dovri era en il Grischun dapli mesiras per cuntanscher las finamiras da clima, cunzunt en la mobilitad electrica. Sper ina promoziun ferma faschessan era regulaziuns pli severas da basegn, scriva il WWF. Per exempel ina regulaziun che pretenda che stgaudaments electrics vegnan remplazzads.
Progress dapi la davosa glista da rangaziun
Il studi dal WWF ha cumpareglià en tschintg secturs las finamiras dals chantuns, las mesiras correspundentas ed ils effects. La finamira era da stgaffir transparenza e da motivar ils chantuns d'emprender in da l'auter, era sch'i ha dà progress dapi il davos ranking l'onn 2019.
Ils tschintg secturs ch'il WWF ha cumpareglià èn:
- l'effizienza d'energia
- la chalur regenerabla
- l'electricitad regenerabla
- la mobilitad electrica
- la funcziun d'exempel da l'administraziun chantunala
Il chantun Basilea-Citad è sin plazza in dal ranking dal WWF, pia il chantun il pli favuraivel al clima. I suondan l'Uri ed il chantun Neuchâtel. Anc bler da far ha il chantun Appenzell Dadens. El è a la fin da la glista da rangaziun.
Il chantun Grischun sa dosta – Meglier giaja adina
Il chantun prendia enconuschientscha dal rapport dal WWF, scriva il Departament d'educaziun, cultura e protecziun da l'ambient en ina communicaziun. I saja correct ch'i dettia bler da far en connex cun la protecziun dal clima, tant sin plaun global sco era sin plaun naziunal e chantunal, ma era tar las interpresas ed en il sectur privat. Il chantun Grischun haja vis baud quai ed elavurà gia il 2016 ina strategia da clima ed era mess en vigur quella en furma dal Green Deal.
Regiun muntagnarda cun handicaps
Tar in rating possian ins adina discuttar davart ils indicaturs applitgads, scriva il chantun plinavant. Sco regiun muntagnarda e turistica giaja il Grischun a la partenza cun in handicap. Quai pervia da sia topografia, l'autezza e las temperaturas pli bassas. E sco chantun turistic stoppia el era procurar per alloschis e per ils transports da turistas e turists. Quai dovria dapli energia e genereschia dapli emissiuns. Tut quai haja per consequenza ch'il Grischun rangheschia tar tscherts indicaturs sin main bunas plazzas. Ch'ins na s'engaschia però betg avunda per la protecziun dal clima, na veglia quai betg dir.
Il chantun è entant persvas ch'il Grischun vegnia a far bun plazzas en il proxim ranking, suenter avair deliberà la lescha da clima chantunala.