Sur Maiavilla en il Signuradi è il guaud da clima. Ina surfatscha cun erva, crappa e plantas en ina saiv. La finamira da quest project è da savair tge sorts da plantas ch'èn resistentas en tge clima. A Maiavilla sin 560 meters sur mar èsi sitg – cun quai ch'i va savens in vent chaud e la costa è da la vart sid vest. Sin questa surfatscha èn stads avant intgins onns anc lareschs. Quels avevan dentant da vegnir smers cun quai ch’els avevan il bau-scorsa. Entras quai è stada questa surfatscha vida ed igl ha gì plaz per il project naziunal.
Sorts indigenas
En tut en vegnidas implantadas 18 differentas sorts da plantas. Quatter da questas èn plantas estras, tut il rest èn indigenas. Michael Gabathuler declera, ch'il project vul explicit uschia quai e che plantas estras pudessan per part esser invasivas e quai è da impedir. Il selvicultur di, ch'il project è enfin uss in success. Quai sa mussa a tut las pitschnas plantas ch’ins vesa sin il terren dal guaud da clima. Per exempel è il ruver tardiv (Quercus petraea) gia creschì bunamain in meter. Il cuntrari è tar il ceder atlantic il cas, ina planta estra. Questa è pirida e n'è perquai betg optimala per guauds Grischuns. Il project duai probablamain cuzzar enfin l’onn 2050. Enfin là vegnia a sa mussar tge plantas ch’èn resistentas al midament da clima.