Tge barrieras datti anc en il mintgadi? Quant lunsch è l’inclusiun? Tge experientschas fan las persunas en lur vita? Questas ed anc bleras autras dumondas tracta RTR durant las emnas da focus. I na duai dentant betg mo esser in rapportar, mabain in focus inclusiv cun participaziun activa da tuttas e tuts.
En Svizra vivan tenor statistica var 1,7 milliuns persunas cun in impediment. Ellas èn part da nossa societad e duain era survegnir in plaz en ils programs dad RTR. Nus na vulain betg be discurrer da las persunas cun in impediment, mabain cun ellas per vesair ed udir, co ellas passentan lur mintgadi.
Live al lieu en coproducziun
La fin da schaner va Radio RTR sin visita en trais differentas regiuns e rapporta live da e cun ils abitants e las abitantas pon far experientschas sco comoderaturs e comoderaturas, assister a las moderaziuns, far lur agen program da musica ed anc bler auter.
- l’ARGO a Surava (30-01-2023),
- dal Movimento a Samedan (01-02-2023)
- e da la Casa Depuoz a Trun (03-02-2023).
Tschintg differentas vitas cun impediment – tschintg purtrets
L’emna ha cumenzà ils 23 da schaner cun la seria «Mia vita, mes mintgadi – viver cun impediment». En questa na discurrin u analisain nus betg, ma nus mussain: En tschintg purtrets stattan tschintg persunas cun impediments en il center. Ellas ed els n'èn betg be il tema, ma las protagonistas da lur atgnas istorgias.
Nus accumpagnain ad Emanuel Nay, a Tanja Zentriegen cun ses chaun d’assistenza Bond, a Matteo De Pedrini, a Cilgia Nuotclà ed a Pascal Leinenbach tras lur mintgadi a Laax e Turitg, Cuira, Son Gagl, Scuol e tras l’Engiadin’Ota e faschain uschia in toc via ensemen cun ellas ed els. Nus essan a chasa ed en scola, en il tren ed en il bus, en il Fürstenwald u en la Sinergia, en la Chasa editura u en la bar – simplamain dapertut là, nua che nus tuttas e tuts essan er.
Dus giadas Cuntrasts
Er ils Cuntrasts sa deditgeschan a la tematica - e quai gist dus giadas. Per l'emissiun dals 29 da schaner ha la squadra da Cuntrasts passentà 24 uras en l'ARGO Cuira. Ils 5 da favrer datti anc ina giada ina scuntrada cun protagonistas e protagonists da la seria «Mia vita, mes mintgadi – viver cun impediment».
