Pascal Leinenbach è tschentà a la maschina da sfender laina ch’el di: «Jau ves nagut, nagut, nagut.» El era 18 onns ch’in accident ha prendì ad el la vesida. «Mabain», raquinta Pascal oz, «igl è uschia» ed el haja stuì far il meglier londeror. El haja emprendì, ch’ins vesia mo cun il cor.
Grazia che jau sun vegnì tschorv hai jau emprendì che guardar guardas cun ils egls, ma vesair vesas be cun il cor. Mintgatant pens jau, bain, forsa eri pli facil da betg esser tschorv. Mabain, igl è uschia. Ed i va bain er uschia, gea.
Cun channa alva e 150% sin via e tras la vita
Ad accumpagnar el tras ses mintgadi da sia lavur a l’ufficina protegida da l’uniun Movimento a Samedan fin tar sia nonna a chasa a Malögia crai ins quai er ad el.
Il di che nus sa scuntrain hai navì. Pascal Leinenbach è en viadi cun sia channa alva. Igl è stentus, bletsch e dad aut ed jau hai mirveglias co ch’el fetschia da s’orientar:
Ina chaussa è il trenament. Ti has dad emprender quai. E l’autra è fitg gronda concentraziun. Perquai che ti has da guardar cun las ureglias, cun la bachetta e ti has la naiv, autos, persunas che vegnan envers tai. Ti has adina dad esser concentrà silmain 150%.
Quai saja in stress e la saira cura ch’el turnia a chasa saja el mintgatant fitg, fitg stanchel. E tuttina: Pascal raquinta en rumantsch, talian e tudestg. El sa englais e portugais, viagia sulet si e giu per l’Engiadina e discurra sco in cudesch. «Sas,» di el, «jau vi viver.»
L'impediment betg visibel sco sfida anc pli gronda
Quai fa el malgrà ch’el ha anc in segund tema ch’occupa el dapi ses accident. El ha in trauma dal tscharvè frontal e quai saja ina chaussa pli cumplitgada.
En mes egls è quai la sfida anc pli gronda co la tschorvadad. La tschorvadad, quella ves’ins. Ah, quel cun ils egliers da sulegl e la channa alva, quel è tschorv. Ma quel problem che jau hai, il trauma dal tscharvè frontal, quel na ves’ins.
Pervi da quel trauma fa Pascal mintgatant, senza ch’el vuless propi, in u dus u er trais sgnoccas da memia. Memia bler per quellas u quels che scuntran el. Ed en sasez èsi er da memia per Pascal Leinenbach sez, ma igl è ses tscharvè, che sa metta da las giadas per travers.
Quai è vaira, gea. Mintgatant èsi uschia. Mabain, jau vegn a stuair emprender dad ir enturn er cun questa chaussa, gea.
Sia vita, ses mintgadi chattais vus qua – e qua èn er ils purtrets dad Emanuel Nay, Tanja Zentriegen e Bond, Matteo De Pedrini e Cilgia Nuotclà.
Or da l'archiv
