Ses num è Bond – simplamain Bond. Bond ha dad engraziar ses num a James Bond e sco l’agent secret James Bond è er il Bond cun quatter chommas en servetsch da sia maiestad. El è in Labrador-retriever ed el è il chaun d’assistenza da Tanja Zentriegen.
In profi dal nas fin a la toppa
Bond è in in profi tras e tras. Per pudair far ses servetsch è el vegnì scolà minuziusamain da la scola da chauns da guida ad Allschwil .
El po seguir ad ina trentina da differents signals auditivs: Per exempel sa el rumir en e rumir ora la maschina da lavar laschiva ed il tumbler, el sa prender si culis u munaida dal fund, sa purtar il telefonin e sco in gentleman gidar da trair en e trair ora la giacca.
-
Bild 1 von 5Legenda: «Grazia a Bond hai jau ina vita autonoma.» RTR -
Bild 2 von 5Legenda: «Bond è l'unic chaun che dastga vegnir en la chasa Sinergia, cunquai ch'el è in chaun d'assistenza.» RTR
-
Bild 3 von 5Legenda: «Avair temp liber senza stuair lavurar è fitg impurtant per chauns d'assistenza sco Bond.» RTR
-
Bild 4 von 5Legenda: Tanja Zentriegen ed il chaun d'assistenza – in team sco atgnamain Bond e ses Bond-girl. RTR
-
Bild 5 von 5Legenda: Cilgia Nuotclà, Pascal Leinenbach, Emanuel Nay, Tanja Zentriegen e Matteo De Pedrini dattan invista en lur mintgadi, lur vitas. RTR
La dunna paraplegica è avisada dapi 18 onns sin la sutga da rodas. Dapi quatter onns e mez ha ella uss agid dad in chaun d’assistenza:
Grazia a Bond hai jau bler dapli autonomia. Uss sai jau far laschiva, cura che quai è necessari e cura ch’i sa cunfa cun il mintgadi.
Bond è qua davent dal mument che Tanja Zentriegen avra ils egls a bun’ura fin ch’ella va puspè a letg. Quai na vul dentant betg dir, ch’il chaun d’assistenza ha da lavurar da bun’ura adura fin saira tard. Sco auters chauns dorma er el 18 uras il di. En las sis uras capita tut tschai: Da magliar e gidar fin a passentar temp liber dadora.
In servetsch bain reglà
Per chauns d’assistenza èsi numnadamain fitg impurtant, ch’els possian passentar mintga di bler temp en il liber. Lura san els svidar la testa e puspè tancar energia. Cun Bond va Tanja Zentriegen savens en il Fürstenwald sper Cuira.
Gea, lura prend jau giu il mantelet uffizial, met si il cularin e lura ha el liber e dastga giugar e savurar e currer.
Per ir en il Fürstenwald prenda Tanja il bus. Quai giaja bain, ma tut ils viadis dador il radius dal bus da citad sajan pli difficils, raquinta ella:
Tar la SBB, en citads pli grondas, hai jau da m’annunziar in'ura avant. I dat er lieus, nua ch’igl è da s’annunziar 24 uras avant. Er tar la Retica èsi da s’annunziar 24 uras avant.
A spass cun il chaun – ina passiunada tranter auters passiunads
Ed anc insatge auter sa mussa tar nossa spassegiada en il Fürstenwald. Tranter tut quellas e quels che van là a spass cun lur chauns è er Tanja simplamain insatgi, che va a spass cun ses chaun. Tut che discurra ensemen da chauns e Tanja è amez lien:
Tranter la glieud cun chauns na fai nagina differenza, sche ti sesas u es en pe.
Uschia n'avra Bond betg be portas realas per Tanja Zentriegen, ma er da quellas tar ils conumans.
Fin ch’in chaun è in profi sco Bond da Tanja Zentriegen dovri ina scolaziun lunga e minuziusa. Bond è da la scola da chauns da guida Allschwil, che scolescha chauns da guida per differents dievers – chauns d’assistenza sco Bond, ma er chauns che gidan a persunas che na vesan u a persunas autisticas u er chauns da terapia. La scola dad Allschwil allevescha perquai sezza chauns da la razza Labrador-retriever.
Al cumenzament dad ina carriera da chaun da servetsch stattan dentant padrinas u padrins. Quellas persunas prendan si in chagniel da 10 emnas per var in onn e mez. Ellas mussan al chaun l’abc da chauns ed al rendan famigliar cun ils conturns umans. Quai dat al chaun giuven la fiduzia e la segirezza per gidar suenter als umans.
La scola surpiglia tut ils custs per il chaun ed accumpogna las padrinas ed ils padrins. Cur ch’il chaun returna a la scola vegn el scolà, tut tenor talent e caracter, a chaun da guida per persunas orvas u autisticas u sco chaun d’assistenza.
Sche vus avais interess da daventar magistra u magister per chagniels che duain daventar er ellas u els ina giada in Bond en il servetsch da lur maiestad – qua datti ulteriuras infurmaziuns .
Sper sia vita, ses mintgadi chattais and ils purtrets dad Emanuel Nay , Matteo De Pedrini, Cilgia Nuotclà e Pascal Leinenbach.