La Punt Chamues-ch - Dretgira superiura duai decider davart surbajegiada per indigens

En il territori Alvra a La Punt Chamues-ch èn planisadas 21 primas abitaziuns pajablas per indigens en quatter chasas sin duas parcellas betg cunfinantas. Quatter partidas, proprietaris da segundas abitaziuns, han fatg recurs cunter quest project. Ussa han els decis da trair vinavant il recurs a la Dretgira superiura dal Grischun. Quai ha ditg Urs Niederegger, il chanzlist communal da La Punt Chamues-ch envers la FMR. Il recurs pertutga dentant mo duas da las quatter chasas planisadas. I sa tracta da las duas chasas ch'ins vul construir sin ina parcella che tutga a la vischnanca burgaisa. L'autra parcela betg cunfinanta tutga a la vischnanca politica.

Realisar la surbajegiada en duas etappas?

Cunquai che la Dretgira superiura sto ussa sa fatschentar cun il cas quintan ins cun ulteriurs retads. Oriundamain era previs da cumenzar cun las lavurs da construcziun gia questa primavaira, cun ils recurs è quest termin però sa spustà sin l'atun u il cumenzament dal 2026 ed uss pudess tut anc ina giada sa retardar. Tenor Urs Niederegger vul la suprastanza communala perquai decider entaifer las proximas duas emnas, sche la surbajegiada Alvra duai vegnir realisada en ina u en duas etappas. Cun ina decisiun da la Dretgira superiura dal Grischun quinta Urs Nideregger ils proxims trais enfin sis mais.

Per la surbajegiada Alvra a La Punt Chamues-ch veva la radunanza communala decis il december 2023 in credit da passa 13 milliuns francs.

Grond interess per las abitaziuns

Per pudair garantir in bun pretsch, metta la vischnanca a disposiziun las abitaziuns en proprietad en condomini, dentant en dretg da construcziun. E per pudair evitar speculaziuns cun las abitaziuns, stoppian proprietaris vender enavos quellas a la vischnanca da La Punt Chamues-ch per il medem pretsch sco els han cumprà ellas. Ina part da las abitaziuns dat la vischnanca era a fit.

Ins haja gia passa 100 interessents per las 21 abitaziuns, di Urs Niederegger vinavant. Ins haja era adattà il project e reducì il dumber d'abitaziuns per pudair far intginas abitaziuns pli grondas.