Il tschains da referenza sa sbassa sin 1,5% – ina reducziun da 0,25 puncts procentuals. Ils tschains chasa èn colliads cun il tschains da referenza. Sche quel sa sbassa, pon ins da princip pretender ina reducziun dals agens tschains. Quai n'è dentant betg adina ina buna idea, declera la redactura d'economia dad SRF Sina Freiermuth.
Tge schabegia, sch'il tschains da referenza sa mida?
Il tschains da referenza mussa ils custs per finanziar ina immobiglia. La Banca naziunala calculescha il tschains median da tut las ipotecas en Svizra ed arrundescha quel sin in quart pertschient. Sche las ipotecas vegnan pli bunmartgadas, sco dapi in per mais, va automaticamain era il tschains da referenza engiu. Per mintga reducziun da 0,25 puncts procentuals pon locataris pretender ina reducziun da l'agen tschains da 2,9% – sch'il tschains sa basa sin in tschains da referenza pli aut.
Tge influenzescha anc ils tschains?
Il tschains dependa era da l'abitaziun u chasa ch'ins abitescha. Tar novas abitaziun dastga la rendita brutta entras las entradas dals tschains esser fin a 3,5 puncts procentuals sur il tschains da referenza. Mo sche la rendita è pli auta, sto ina locatura reducir ils tschains. Ed era ils custs per l'administraziun ed il mantegniment influenzeschan ils tschains – e l'inflaziun.
Tge influenza ha l'inflaziun?
Sch'il nivel da pretschs s'augmenta, po in locatur sa prestar pli pauc cun las entradas dals tschains. El dastga dar vinavant 40% da l'inflaziun a la locataria – en furma d'in tschains pli aut.
Èsi pia pussaivel ch'il tschains vegn pli char, malgrà ch'il tschains da referenza va engiu?
Gea, tut tenor co l'inflaziun è sa sviluppada dapi la davosa giada ch'il tschains da referenza è vegnì fixà, poi esser ch'in locatur ha dabun dapli cumpensaziun da la chareschia che la reducziun che la locataria po pretender. Sch'ins pretenda pia ina midada dal tschains poi esser ch'ins paja la fin dapli.
Tgi duess studegiar bain da pretender uss ina reducziun dal tschains?
Pli probabel na profiteschan persunas ch'han suttascrit in nov contract tranter il prim da matg 2015 ed il prim da december 2023 betg d'ina reducziun. Quai di l'Associaziun svizra da locataris e locatarias. Dapi il matg 2015 è la chareschia s'augmentada per 7%. Locaturs pudessan pia pretender ina relativ auta cumpensaziun da l'inflaziun che fiss pli auta che la reducziun dal tschains. Ils davos mais è l'inflaziun dentant sa reducida. Cun in contract nov a partir da l'entschatta dal 2024 han ins ina meglra schanza da survegnir ina reducziun, cun quai che la cumpensaziun per la chareschia è pitschna.