La radunanza communala da La Punt Chamues-ch ha approvà il glindesdi in credit da 13,6 milliuns francs per construir emprimas abitaziuns. Las chasas cun totalmain 27 abitaziuns primaras vegnan construidas en il territori Alvra, che sa chatta sur la staziun ed en direcziun dal Pass da l’Alvra. Duas parcellas en possess da la vischnanca e la vischnanca burgaisa preves'ins da surfabritgar. La vischnanca vul per part vender quellas, e per part dar a fit.
Tenor infurmaziuns dal chanzlist Urs Niederegger datti in grond interess per quellas abitaziuns. La vischnanca vul attrair oravant tut persunas giuvnas e famiglias, insumma persunas che vegnan a lavurar en la regiun. Per finanziar il project preves'ins da prender si in credit da la banca e cun ils fits da las abitaziuns pajar il fit dal credit.
L'auter onn preves'ins da planisar ed acquirir ils interessents. Las abitaziuns duain esser prontas a partir da la fin da l'onn 2026.
Sbassà il pe da taglia
En pli ha la radunanza communala approvà unanimamain il preventiv ed il pe da taglia per il 2024. Il preventiv quinta cun in surpli da var 1’700 francs. Il pe da taglia è da nov tar 49% da la taglia chantunala simpla.