«Grondas schanzas n'hani betg» - La Punt Chamues-ch: Recurs cunter project da bajegiar

Sco a Ftan fan proprietaris da segundas abitaziuns era opposiziun encunter ina surfabricaziun planisada a La Punt Chamues-ch. En il territori Alvra èn planisada 21 primas abitaziuns pajablas en quatter chasas. Per quai project aveva la radunanza communala decis il december 2023 in credit da passa 13 milliuns francs.

En tut quatter recurs

Perquai che quatter partidas hajan fatg recurs encunter il project, haja la vischnanca stuì analisar quel e far in pitschen midament vi da la surfabricaziun, di il chanzlist communal Urs Niederegger. La vischnanca haja alura era tramess la decisiun da construcziun e protesta als requirents e requirentas. Quels han temp da trair vinavant il cas a la Dretgira suprema dal Grischun, enfin ils 11 da mars.

Per far la segira ch'il project correspundia al plan da quartier ed a la lescha da construcziun hajan ins fatg correcturas marginalas vi dals plans da construcziun dad ina chasa. Cunquai n'hajan era ils requirents nagina schanza d'avair success cun lur protesta, di il chanzlist vinavant.

Grond interess per las abitaziuns

Per pudair garantir in bun pretsch, metta la vischnanca a disposiziun las abitaziun en proprietad en condomini, dentant en dretg da construcziun. E per pudair evitar speculaziuns cun las abitaziuns, stoppian proprietaris vender enavos quellas a la vischnanca da La Punt Chamues-ch per il medem pretsch sco els han cumprà ellas. Ina part da las abitaziuns dat la vischnanca era a fit.

Ins haja gia passa 100 interessents per las 21 abitaziuns, di Urs Niederegger vinavant. Ins haja era adattà il project e reducì il dumber d'abitaziuns per pudair far intginas abitaziuns pli grondas.

Cumenzar a bajegiar l'atun

Sch'il recurs na vegnia betg tratg vinavant, vegnian las lavurs scrittas ora ed ins veglia decider tge persunas che survegnian las abitaziuns. La finamira fiss da cumenzar cun las lavurs da construcziun il november u a l'entschatta da l'auter onn.