Il meglier mountainbiker dal mund na patratga anc betg vi da chalar ed er betg vid ina davosa stagiun da cumià. Per il 2025 ha Nino Schurter, cun 38 onns entant il pli vegl en la cuppa mundiala da mountainbike, anc pliras finamiras. Tranter auter vul el cumbatter per ina medaglia al campiunadi mundial a Crans-Montana e per l’autra anc ina giada far furora a la cursa da la cuppa mundiala da chasa il settember a Lai.
En sia carriera, che cuzza ussa gia passa dus decennis, ha Nino Schurter cuntanschì tut quai ch’i dat da gudagnar en sia disciplina cross-country. Diesch giadas campiun mundial, nov giadas victur da la cuppa mundiala generala e campiun olimpic il 2016 a Rio – in palmarès maiudì. Cumenzà ha tut da pitschen a Tersnaus. Oz è Schurter ina legenda e savens vegn el er titulà sco il Roger Federer dal sport da mountainbike.
Uschè ditg ch’il fieu brischa ed uschè ditg ch’jau poss anc cumbatter cun ils megliers dal mund na vi e sai jau betg chalar.
Sche sia carriera va propi a fin l’onn proxim, sco quai che Nino Schurter ha communitgà avant in temp, na po el betg dir. Quai dependia er bler dals resultats il 2025, uschia Schurter. Chattar il dretg mument per dir adia na saja betg simpel e Nino Schurter fa er vess da prender questa decisiun, cunzunt perquai che sia motivaziun da trenar e far cursas è uschè gronda sco anc al cumenzament.
Tuttina sche sia carriera cuntinuescha er il 2026 u betg, lungurus na vegni franc betg tar Nino Schurter. En ses temp liber giauda el la vita cun bler sport, cun fotoshootings, cun divers projects en l’Africa ed er cun sgular cun helicopter. Questa patenta ha el fatg durant il temp da corona. Il pli fitg giauda el dentant il temp cun sia famiglia ed amis, e cunzunt cun sia feglia. Da sia figlia Lisa saja el il pli losch. Ella muntia ad el bler dapli che mintga medaglia e success. E tuttina, cun il sport da mountainbike vegnia el pli probabel er ad avair suenter sia carriera ina relaziun pli stretga en in furma u l’autra, uschia Nino Schurter envers RTR.
