I n’è betg stà la cursa olimpica che Nino Schurter ha mess avant. Il mountainbiker oriund da Tersnaus ha stuì sa cuntentar a Paris cun il novavel plaz cun, quei cun in retard da 2:22 minutas sin il Brit Tom Pidcock che gudogna a moda dramatica.
Nino Schurter ha pers gia baud il contact cun la testa sin quest percurs fitg svelt, fisic e tecnicamain pauc pretensius. Gia suenter la mesadad da la cursa ha il Lumnezian stuì sutterrar il siemi da gudagnar ina quarta e davosa medaglia olimpica.
Il mountainbiker grischun era sa preparà acribic sin questa cursa ed ha fatg il viadi a Paris cun grondas ambiziuns. La finala n’èsi betg stà ses di. Tuttina po il grond star en questa scena da mountainbike mirar enavos sin ina grondiusa aventura olimpica ch’ha cumenzà il 2008 a Peking cun gudagnar bronz. Quatter onns pli tard vegn vitiers argient ed il 2016 a Rio la medaglia dad aur. Sper las trais medaglias olimpicas è Nino Schurter er vegnì 10 giadas campiun mundial da cross country.
Diplom per Mathias Flückiger
Ditg pudì cumbatter per ina medaglia ha Mathias Flückiger. La finala ha el dentant terminà la cursa sco tschintgavel, quai cun in retard da 1:20 minutas. Avant trais onns a Tokyo aveva il Bernais anc gudagnà argient davos Tom Pidcock.
Tom Pidcock defenda ses titel
Campiun olimpic daventa sco gia il 2021 a Tokyo, il Brit Tom Pidcock. Malgrà in defect tecnic suenter paucas rundas ha el encunter la fin da la cursa puspè surpiglià la testa e la finala triumfà avant il Franzos e mattadur local Victor Koretzky (+0:09 sec.). Pidcock ha dentant era procurà per ina scena dispitaivla curt avant l'arrivada. Cun surpassar Koretzky ha el stuschà il Franzos ch'è quasi cuppitgà e ch'ha uschia stuì sutterrar aur olimpic davant ils fans da chasa. Bronz gudogna il Sidafrican Alan Hatherly (+0:11 sec.).
Sche tut constat è tut pussibel
Sin Nino Schurter spetga la tschintgavla e pli probabel davosa cursa olimpica. Suenter bronz a Peking (2008), argient a Londra (2012) ed aur a Rio (2016) vul Schurter ina quarta e davosa medaglia. Pussibel è tut. Malgrà ses 38 onns tutga il mountainbiker grischun anc adina tar ils cunfavurits. E sche tut constat a quest pli impurtant di da l’onn è tut pussibel, er aur olimpic.
Constar sto tant la furma dal di, las chommas, il chau, il cletg da cursa sco er il material. Per quel è dapi passa 12 onns Yanick Gyger responsabel, il mecanist da Nino Schurter che vegn er numnà «Yanick the Mechanic». RTR ha perquai guardà durant la davosa cuppa mundiala a Crans-Montana sur la spatla da Yanick Gyger e persequità il mecanist durant in di da cursa.
Nino Schurter: «Quai è per mai ina gronda onur»
Gronda onur per Nino Schurter. Il mountainbiker lumnezian ha dastgà purtar la bandiera svizra a la festa d’avertura dals gieus olimpics a Paris, quai ensemen cun la tiradura Nina Christen. Omadus èn gia campiuns olimpics. Schurter aveva gudagnà aur il 2016 a Rio e Christen avant trais onns a Tokio.
La festa d’avertura n'è per l’emprima giada betg vegnida manada tras en in stadion, mabain sin in flum, sin la Seine che maina tras la citad principala da la Frantscha. Atletas ed atlets èn vegnids manads da la Seine giuadora sin 160 bartgas.
La segunda giada en il focus stat Nino Schurter gia il glindesdi, ils 29 da fanadur. Lura spetga sia cursa olimpica da cross-country. A ses davos gieus olimpics vul il mountainbiker grischun da 38 onns anc gudagnar ina quarta e davosa medaglia. El sa sentia bain e tut saja pussibel ha Schurter ditg a l'inscunter da medias en la «Maison Suisse» che sa chatta en l’ambassada svizra amez la citad da Paris, betg lunsch davent da la Tour Eiffel.
BIKETALK - 30 dumondas e 30 respostas
Julia Hegar, Yanick Gyger e Thomas Frischknecht
Tgi è Nino Schurter propi? Co ticca el? En il «BikeTalk» datti mintgamai 30 dumondas a las pli impurtantas persunas dal team enturn l'atlet da record Nino Schurter.
Il team enturn Nino Schurter è ferm persvas dad el. Quai badan ins spert, sch'ins vesa uschè expressiuns sco qua:
Nino Schurter è «The Goat», il meglier mountainbiker ch’igl ha insumma dà.
Ma co è Nino Schurter sco persuna? Tge ha el gugent, tge betg? E co è el sper ils tracks da bike ed ordaifer il trenament? Tut quai pudais tadlar en ils differents discurs cun la fisioterapeuta Julia Hegar, il mecanist Yanick Gyger u «Yanick the Mechanic» ed il manager e schef d'equipa Thomas Frischknecht, era numnà il «Frischi».
Nino Schurter – in dals favurits a ses davos gieus olimpics
Suenter bronz als gieus olimpics il 2008 a Peking, argient il 2012 a Londra ed aur il 2016 a Rio vul Nino Schurter anc gudagnar ina quarta medaglia a ses, pli probabel, davos gieus olimpics. A Paris vul Schurter dentant er far revantscha per la terrada als davos gieus olimpics il 2021 a Tokyo nua ch’el ha stuì sa cuntentar cun il quart plaz.
Il mountainbiker lumnezian è en mintga cas partì cun grondas ambiziuns vers Paris. Malgrà ch’el è gia 38 onns vegl tutga Schurter anc adina tranter ils megliers mountainbikers dal mund.
![Nino Schurter](https://www.rtr.ch/static/cms/images/960w/4f354e.jpg)
En questa stagiun ha il dieschupel campiun mundial tranter auter gudagnà la cursa da la cuppa mundiala en la Val di Sole en l’Italia. La davosa cursa da la cuppa mundiala a Les Gets ha Nino Schurter laschà ora per sa focussar, trenar e sa concentrar cumplettamain sin la pli impurtanta cursa da la stagiun en la chapitala franzosa. La davosas emnas ha il Lumnezian perquai trenà en l’autezza, en la regiun dal Pass Bernina en l’Engiadina.
Dasper Nino Schurter parta ord vista svizra anc Mathias Flückiger a la cursa da cross country ch’è il glindesdi, ils 29 da fanadur a las 14:10 uras. Il grond rival dal duo svizzer e grond favurit è il Brit Tom Pidcock, il defensur dal titel. Pidcock ha dentant stuì dar si dacurt il Tour de France pervia da Corona.