Boa tarde Rio - Dumagnà! – Finalmain ha Nino Schurter er aur olimpic

La glista da success da Nino Schurter è impressiunanta. Il mountainbiker da Tersnaus ha gudagnà quatter giadas la cuppa mundiala generala, è vegnì quest onn per la tschintgavla giada campiun mundial ed ha gia gudagnà duas medaglias olimpicas: bronz a Peking ed argient a Londra. Uss ha Nino Schurter er la medaglia d'aur olimpica che mancava anc ad el.

Sco campiun mundial actual è Nino Schurter partì dumengia sco topfavurit a la cursa olimpica da mountainbike. Ses pli gronds concurrents eran ils medems sco adina ils ultims onns, il Franzos Julien Absalon ed il Tschec Jaroslav Kulhavy, omadus èn gia campiuns olimpics.

La gronda part da la cursa ha Nino Schurter fatg ensemen cun Kulhavy. Vers la fin è el dentant sa distatgà da ses pli ferm concurrent ed ha gudagnà la cursa cun in temp da in'ura 33 minutas e 28 secundas. Sin il segund, Jaroslav Kulhavy, ha el gì in avantatg dad exact 50 secundas. Bronz va al Spagnol Carlos Coloma Nicolas.

Serrar

00:55

video

Nino Schurter suenter la victoria da la medaglia d'aur Rio 2016

Or da RTR dals 22.08.2016.

laschar ir. Durada: 55 Secundas.

03:11

video

Public Viewing dal Club da velo Surselva a Glion

Or da Telesguard dals 22.08.2016.

laschar ir. Durada: 3 minutas 11 Secundas.

Nino Schurter porta la bandiera

Il mountainbiker sursilvan porta la bandiera da la delegaziun svizra en il stadion per la ceremonia finala dals gieus olimpics a Rio. Quai ha communitgà Swiss Olympic. Quest'onur fetschia ad el fitg plaschair, ha ditg Nino Schurter. El è il segund mountainbiker svizzer che porta la bandiera da la delegaziun svizra ad ina ceramonia olimpica. L'onn 2000 aveva Thomas Frischknecht purtà la bandiera a la ceremonia d'avertura a Sydney.

RR actualitad/sportissimo 17:00+