- Nino Schurter ha gudagnà la cursa da la cuppa mundiala en Val di Sole en l’Italia a moda suverana.
- Per la decisiun ha il Lumnezian procurà cun in’attatga suenter la quarta da set rundas.
- Schurter engrondescha uschia ses record cun questa 36avla victoria en la cuppa mundiala.
Sch’i va tenor Nino Schurter pon ils gieus olimpics a Paris vegnir. Sis emnas avant quest punct culminant da la stagiun sa preschenta il mountainbiker oriund da Tersnaus en ina furma excellenta.
Gia suenter paucs meters ha Nino Schurter surpiglià la testa e silsuenter dictà il tempo fin la fin. Il sulet ch’ha pudì restar sin ils chaltgogns a Schurter è stà il Sidafrican Alan Hatherly. Suenter la quarta runda è crudada la decisiun. Durant che Hatherly è ì tras la zona da nutriment ha Schurter lantschà l’attatga decisiva. L’avantatg sin il Sidafrican è sa engrondì da meter tar meter, da secunda tar secunda. Durant la davosa runda n’ha Nino Schurter betg pli stuì ristgar tut, per uschia betg periclitar sia 36avla victoria en ina cursa da cross country da la cuppa mundiala.
La finala ha Nino Schurter triumfà cun in avantatg da 7 secundas sin Alan Hatherly. Il sprint per il terz plaz ha gudagnà il Franzos Mathis Azzaro avant il Talian Luca Braidot ed il collega d’equipa da Nino Schurter, il Tessinais Filippo Colombo. Cun Marcel Guerrini sco 7avel e Lars Foster sco 8avel han anc dus ulteriurs svizzers persvadì in’emna avant la cursa da la cuppa mundiala da chasa a Crans-Montana.
Mathias Flückiger che vegn, dasper Nino Schurter, a preschentar la Svizra als gieus olimpics ha pers bunamain duas minutas ed uschia stuì sa cuntentar be cun il 12avel plaz. Vital Albin da Tersnaus ha pers 4:48 minutas e cuntanschì l’arrivada sco 36avel. Ursin Spescha da Sevgein è vegnì 52avel cun in retard da 7:49 minutas.
Il podest dals umens d'elita – cursa da cross country:
- Nino Schurter (Svizra) 1:18:25 uras
- Alan Hatherly (Africa dal Sid) +7 secundas
- Mathis Azzaro (Frantscha) +46 secundas
Val di Sole – in lieu tut spezial per Schurter
Val di Sole ha survegnì en la carriera da Nino Schurter in plaz tut spezial en ses cor. Sia 36avla victoria da la cuppa mundiala munta er gist ses 69avel podest sin quest stgalim. A tut las cursas da la cuppa mundiala en Val di Sole en l’Italia è Schurter stà sin il podest – 7 giadas ha el gudagnà. Avant in onn vev’el festivà là sia davosa victoria fin oz. Il 2021 era Schurter er daventà en Val di Sole campiun mundial, quai avant Mathias Flückiger.
Ferrand-Prévot ina classa per sa sezza – Svizras senza schanza
- La campiunessa mundiala Pauline Ferrand-Prévot (Frantscha) ha gudagnà la cursa da cross country en Val di sole a moda suverana avant Puck Pieterse (Pajais Bass) e Candice Lill (Africa dal Sid).
- Las Svizras n’ha gì nagina schanza da cumbatter per in plaz da podest. Per ellas ina cursa plitost d’emblidar.
En la quarta cursa da cross country en questa stagiun n’han las mountainbikeras svizras per ina giada betg pudì persvader. Cun Alessandra Keller sco 10avla cun in retard da 4:03 minutas è sulet ina Svizra classada sut las top 10 en Val di Sole. Linda Indergand è vegnida 14avla, Ramona Forchini 17avla e Sina Frei ch’ha dà en Val di Sole ses comeback suenter sia blessura è vegnida 19avla. Betg a la partenza è stada Jolanda Neff ch’è il mument a la partenza al Tour de Suisse.
Betg stada da franar è Pauline Ferrand-Prévot. La Franzosa ha triumfà a moda suverana. Gia en la segunda da sis rundas ha la gronda favurita pudì sa distanziar da tut sias concurrentas. Per Ferrand-Prévot èsi la segunda victoria en seria. Uschia ha ella er demonstrà sias ambiziuns sin aur olimpic avant ils fans da chasa a Paris.
Il podest da las dunnas d'elita – cursa da cross country:
- Pauline Ferrand-Prévot (Frantscha) 1:21:04 uras
- Puck Pieterse (Pajais Bass) +50 secundas
- Candice Lill (Africa dal Sid) +1:13 minutas
Ginia Caluori manchenta per pauc il podest – premiera per Chiara Solèr
Tar ils umens sut 23 onns è il Svizzer Finn Treudler vegnì terz (+29 sec.) davos ils dus Americans Riley Amos e Bjorn Riley. Il Grischun Janis Baumann dad Igis è vegnì 19avel (+3:35 min.).
In podest svizzer hai er dà en la cursa da las dunnas sut 23 onns, quai entras Elina Benoit ch’è vegnida terza (+2:37 min.). Ginia Caluori da Panaduz ha danovamain persvadì sco 7avel (+3:21 min.). Annina Hutter da Trimmis è vegnida 21avla (+6:33 min.) e Chiara Solèr da Lumbrein ch’è stada per l’emprima giada a la partenza ad ina cursa da la cuppa mundiala da las U23 è vegnida 32avla (+9:53 min.).
Uschia vai vinavant
En in’emna stat sin il program la segunda davosa cursa da la cuppa mundiala avant ils gieus olimpics a Paris, quai a Crans-Montana en il Vallais. Sin ils Svizzers spetga uschia ina cursa da chasa.
Schurter persvada en il short track
Nino Schurter è stà il meglier svizzer en la cursa da short track dal venderdi saira. Il Grischun da 38 onns ha manà durant il temp la cursa, ha la finala dentant stuì laschar surpassar intgins concurrents. Gist davos Schurter ch’è daventà quart, ha Filippo Colombo persvadì sco 5avel. Mathias Flückiger e Marcel Guerrini èn classads sin plaz 10 ed 11.
Podest dals umens - cursa da short track:
- Samuel Gaze (Nova Zelanda)
- Victor Koretzky (Frantscha)
- Jens Schuermans (Germania)
Tar las dunnas è Alessandra Keller vegnida sco meglra svizra 5avla. Sina Frei è daventada 6avla tar ses comeback suenter sia blessura vi dal maun. Sut las top 10 è era anc classada Linda Indergand sco 9avla.
Podest da las dunnas - cursa da short track:
- Puck Pieterse (Pajais Bass)
- Pauline Ferrand-Prévot (Frantscha)
- Savilia Blunk (Stadis Unids)