Il CB Trun/Rabius ha la schanza da cuntanscher per la segunda giada en roda il final da la Cuppa grischuna da ballape. Il davos obstachel – il CB Lumnezia. Las premissas en vista a quest mezfinal encunter ils Lumnezians da glindesdi Pasca a Trun èn però pauc bunas. A l’equipa da Claudio Bundi è il cumenzament da la runda da primavaira ida en las chautschas. Trais gieus, trais terradas, sajettà in sulet gol – quai la bilantscha. E tuttina n’han ils da Trun/Rabius betg pers la fidanza, èn dentant er pertscherts ch’i spetga cun Lumnezia ina dira nusch.
Da glindesdi Pasca dat quai in nov gieu, nossas schanzas vegnan ed jau sun er persvadì ch’i scalina lura cun gols.
Ils da Trun/Rabius speran er sin lur avantatg da chasa. Els dastgan giugar quai mezfinal sin lur plazza a Pustget, ina plazza in zic pli gronda che quella en Lumnezia. Plinavant pon ils da la Cadi er sperar sin grond sustegn dals fans.
Prioritad è da restar en 3. liga
A Trun/Rabius siemian ins gia daditg da puspè gudagnar ina giada la Cuppa grischuna e turnar a chasa cun quest buccal. Avant in onn è l’equipa da Claudio Bundi stada fitg datiers. Trun/Rabius ha pers il final encunter Cuira 97 pir en la prolungaziun cun 1:3. Danovamain cuntanscher il final e far meglier ch’il 2024, quai è uss la devisa. Il focus è e resta però sin il campiunadi. La gronda finamira è da gudagnar quest cumbat cunter la relegaziun per restar vinavant en la terza liga. Quai purtassi a l’entira equipa, cunzunt er als giuvens dapli, di Gianin Derungs. Claudio Bundi accentuescha plinavant: sche nus cuntanschain il final u gudagnain schizunt quest onn la Cuppa grischuna da ballape fiss quai er in uschenumnà catalisatur per la finiziun dal campiunadi.
Il squitsch è tar Trun/Rabius. Nus dastgain, els ston gudagnar
Sin lur via en il mezfinal ha il CB Lumnezia eliminà il november il club da segunda liga da Valposchiavo Calcio. In pau ina surpraisa, ma quest di ha tut funcziunà. Ed era encunter ils da Trun/Rabius sto tut constar per ch'il proxim coup grategi, di il trenader Marco Blumenthal. Cuntanscher il final da la Cuppa grischuna fiss istoric per ils Lumnezians ch'han en l'istorgia da lur club anc mai cuntanschì il final da quest turnier.
Sche tut ils facturs constattan quel di po il puzzle schon ir si
Durant nossa visita ad in dals ultims trenaments puncteschan ils giugaders adina puspè ch'il plaschair da pudair dar quest mezfinal encunter in'equipa sursilvana saja grond. Era ch'i vegnia puspè a questa sort da derby tranter las duas emprimas equipas dals dus clubs. Tals duels n'hai betg pli dà dapi ch'il CB Lumnezia è vegnì relegà en quarta liga avant trais onns. Plinavant punctueschan ils giugaders, ch'il squitsch saja cler tar ils da Trun/Rabius che dattan en ina liga pli auta. Lezs stoppian ed els dastgian gudagnar.
Pli gugent gudagnar la cuppa ch'ir si en terza
Ils giugaders da tschep e pli arrivads dal CB Lumnezia, ch'han gia dà pli baud en terza liga, preferissan, sch'els stuessan eleger tranter titel e buccal da la Cuppa grischuna ubain la promoziun en terza liga, da gudagnar la Cuppa grischuna. Ma uss ina giada persvader en il gieu da mezfinal e lura guardar vinavant. En tutta cas na stoppian els temair nagut ed hajan era nagut da perder encunter ils adversaris da la Cadi. Ed in zic siemiar dastgian ins adina.
CB Trun/Rabius – CB Lumnezia, glindesdi da Pasca, a las 15:00 uras, a Pustget/Trun.