Umens: Cuira 97 batta Trun/Rabius en la prolungaziun 3:1
La decisiun è crudada en la prolungaziun. Là è l'emprim Cuira ì en avantatg 2:0. Trun/Rabius ha immediat pudì reagir e scursanì entras in penalti da Livio Janka. En l'ultima minuta da la prolungaziun han ils Sursilvans lura anc gì la gronda schanza d'egualisar. Il goli ha dentant parà il sajet e cun il conter ha Cuira 97 decis il gieu.
En las 90 minutas regularas han ils fans vis in gieu fitg cumbattì tranter duas equipas gulivas. Fertant ch'i ha dà en l'emprima mesadad mo paucas occasiuns da gol è quai sa midà suenter pausa. Cuira ha tut en tut gì in lev surpli dal gieu ed ha er gì inqual occasiun da marcar in gol. Ma da l'autra vart ha Trun/Rabius gì discletg cun in gol ch'è stà offside e cun in sajet en la latta curt avant la fin tal temp regular.
La fin pon ins dir che il final avess pudì cupitgar sin omaduas varts. L'equipa da Cuira 97 ha dentant la fin er gì il cletg necessari per gudagnar uschia in gieu.
Final tranter duas equipas da 3. liga
Il CB Trun/Rabius ha vulì gudagnar la Cuppa grischuna per l'emprima giada suenter 45 onns. Lev favurit en quest duel è dentant tuttina Cuira 97 stà. L'equipa da la chapitala grischuna è sin plazza 5 en la tabella ed ha gudagnà en il mezfinal encunter Valposchiavo Calcio che dat en 2. liga regiunala. Il CB Trun/Rabius è sin plazza 10 da la tabella en 3. liga, gist sur il stritg, ed il sulet duel da campiunadi questa stagiun han ils Sursilvans pers cun 1:2 encunter Cuira.
Dunnas: Tusaun-Cazas gudogna cun 1:0 encunter il CB Domat
Il sulet gol è crudà suenter pausa entras Laura Pinto Martins. Tusaun-Cazas resta uschia il numer in en il ballape da dunnas. Tar la 13avla ediziun è quai gia stà la 10avla victoria per l'equipa da Tusaun.
Il final Tusaun-Cazas encunter il CB Domat ha vairamain tradiziun en la Cuppa grischuna. Dals davos otg finals hai dà set giadas quest duel. Sis giadas ha l'equipa da Tusaun triumfà e mo ina giada il CB Domat.
In final plain tensiun hai dà l'onn passà, lura ha la lutga da penaltis stuì decider il gieu suenter ch'i steva 0:0 suenter il temp regular. A moda dramatica ha lura il favurit da Tusaun che deva lura anc en 1. liga gudagnà la Cuppa grischuna 2023 encunter il CB Domat da la 2. liga.
Quest onn è la situaziun in zic autra. Omaduas equipas dattan dapi la stagiun 2023/2024 en la 2. liga, cunquai che l'equipa da Tusaun è dada gì l'ultima stagiun. En il campiunadi actual è Tusaun/Cazas sin plazza 4 ed il CB Domat sin plazza 9. En il sulet gieu da campiunadi fin uss ha Tusaun gudagnà cun 2:0.
