I dat istorgias da pli baud che vegnan adina puspè raquintadas. Istorgias ch'èn quasi legendaras entaifer collegas u entaifer l'uniun. Ina da questas istorgias nunemblidaivlas datti er tar il CB Trun (dapi 1991 CB Trun/Rabius).
Nus scrivin l'onn 1979
Il CB Trun dat ballape en 3. liga e frunta en il final da la Cuppa grischuna sin il FC Landquart. Las duas equipas dattan bain en la medema liga ballape, dentant è l'equipa dal Signuradi da favurisar. Ma i vegn tut auter. Trun mussa ina ferma prestaziun e gudogna gist cun 5:0 cunter Landquart. Uschè cler sco il resultat sin palpiri n'è il gieu dentant betg. Quatter gols crodan pir en las ultimas 15 minutas. Ma tuttina, il club da la Cadi ha er il cletg necessari e gudogna per l'emprima e fin oz suletta giada la Cuppa grischuna. Il titel en la Gasetta Romontscha da gliez temp: «Il buccal en Surselva!!!»
In di magic per giugaders, fans e funcziunaris dal club. Sin quest mument era vegnì spetgà cun brama. Igl era perfin vegnì fatg la scumessa che sche il CB Trun gudogna, lura vegni ì a pe in di da Cuira fin a Trun. Fatg la scumessa avevan Carli Tomaschett, da lezzas uras l'um che scriveva ils rapports da gieu per il club e la gasetta, ed il chapitani Benedetg Albin.
Questa idea è naschida fitg spontan en la ustria Cruna a Trun, forsa er suenter la segunda u terza Calanda. Ins era propi en quel fieu e sa legrava sin quest final.
Il viadi è lura era vegnì fatg, la fin finala da Carli Tomaschett ed il president ad interim, Linus Collenberg. Il capitani aveva pervia da problems cun il pe betg pudì far ils radund 50 kilometers. Il viadi è lura stà in'excursiun plain muments leghers, inscunters, puschegn tar il trenader a Schluein ed er muments pli malempernaivels. Almain per Linus Collenberg. Lez aveva extra cumprà novs chalzers per quest viadi, ma la fin finala ha er el gì problems cun ils pes durant la tura.
Jau n'hai betg pensà ch'jau hai in zic pes difficils.
Ils ultims kilometers da Danis a Trun haja el fatg en pe blut, cunquai ch'i fascheva uschè mal ed era uschè malempernaivel. A las 17:00, suenter 12 uras viadi èn els lura arrivads a Trun.
Intginas regurdientschas dal 1979
-
Bild 1 von 3Legenda: Linus Collenberg ha purtà cun el fotografias dal triumf d'avant 45 onns. Linus Collenberg
-
Bild 2 von 3Legenda: Ina fotografia che mussa il chapitani Bendetg Albin che survegn il buccal Linus Collenberg
-
Bild 3 von 3Legenda: L'equipa da Trun vi da giubilar suenter in gol. Linus Collenberg
Sche ils dus umens pensiunads guardan oz enavos sin quest gieu ed er sin l'aventura a pe èn els bain er in zic loschs. Igl èn muments ch'els na vegnan mai ad emblidar. E natiralmain avessen er els plaschair sch'i gartegiass al CB Trun/Rabius dad ir, 45 onns pli tard, per il segund titel en la Cuppa grischuna.
45 onns suenter il sulet triumf en la Cuppa grischuna ha il CB Trun/Rabius puspè la schanza dad ir per il buccal da la Cuppa grischuna. En il final d'Ascensiun frunta l'equipa da la Cadi sin la segund'equipa da Cuira 97. Il gieu cumenza a las 16:00 sin la Obere Au a Cuira.
Tar las dunnas vegni tar il final sco quasi adina ils ultims onns: Tusaun-Cazas frunta sin il CB Domat. Quest gieu cumenza gia a las 13:30.