3. liga
Las duas equipas sursilvanas dal CB Trun/Rabius e la US Schluein Glion tutgan dapi plirs onns tar las equipas fixas en 3. liga. Schluein Glion è per regla l'equipa che cumbatta per la promoziun en 2. liga e Trun/Rabius è l'equipa che cumbatta plitost encunter la relegaziun.
Questa stagiun n'ha l'equipa da Schluein Glion da principi betg pli da far bler cun la promoziun, malgrà ch'ella è sin plazza dus da la tabella. Il retard sin il leader da Bogn Ragaz dumbra dentant 11 puncts. Pliras terradas nunnecessarias han chaschunà il retard. Tuttina èsi anc pussaivel che la promoziun gartegia. I n'è numnadamain er anc pussibel ch'il segund da la tabella po medemamain far la promoziun.
Nus avain trenà l'atletica ensemen cun Carlo Janka. Quai ha segir dà impuls positivs a l'equipa. Atleticamain essan nus uss sin in'auter nivel che la stad passada.
L'autra equipa en terza liga è il CB Trun/Rabius ch'ha mussà ina runda d'atun solida ed è actualmain rangà sin plaz 8 da 12 equipas. L'avantatg sin il stritg èn dentant mo trais puncts. Uschia ch'i pudess per l'equipa da la Cadi puspè dar in dir cumbat fin la fin. La finamira principala è evidentamain da segirar uschè spert sco pussibel la classa. En l'emprim gieu da questa runda da primavaira frunta il club da Trun/Rabius sin il leader da Bogn Ragaz.
Nus avain ils giuvens ch'han fatg in pass enavant durant la preperaziun. Uschia main cun in bun sentiment en questa runda da primavaira.
Sper il campiunadi han tant Schluein Glion sco er Trun/Rabius anc nudà grond e grass la Cuppa grischuna en il chalender. Ils 21 d'avrigl dattan omaduas equipas lur mezfinals. Trun/Rabius frunta a chasa sin il CB Lumnezia da la 4. liga e l'US Schluein Glion a chasa sin Landquart che dat medemamain en 3. liga. La schanza è en mintga cas buna ch'i dat d'Ascensiun – ils 29 da matg – in final tranter ils dus rivals.
2. liga regiunala
Duas equipas grischunas cumbattan en questa liga per puncts e victorias. Quai è per ina il CB Domat e per l'autra Valposchiavo Calcio. Ed era qua vala per omaduas equipas da guardar emprim ina giada enavos.
L'equipa ambiziunada da Domat ha cumenzà l'atun passà mal la stagiun. Cun il temp è l'equipa dentant vegnida meglier en furma ed ha terminà la runda d'atun sin plazza 8 da 14 equipas, cun quatter puncts avantatg sin il stritg. Sche tut va normal na vegn l'equipa da Domat dentant betg ad avair da cumbatter encunter la relegaziun. Liber cun il campiunadi per l'equipa dad Eder Lala vai encunter Romanshorn.
Ina surpraisa è puspè ina giada l'equipa da Valposchiavo Calcio stada l'atun passà. Er en la segunda stagiun en 2. liga han ils Puschlavins procurà per inqual surpraisa e terminà la runda d'atun sin plazza 10 cun dus puncts avantatg sin las plazzas da relegaziun. E quai malgrà che l'equipa ha gì bler midadas la stad passada. Cler è dentant er che l'equipa dal trenader Tiziano Togni vegn, fitg probabel, a stuair cumbatter fin la fin encunter la relegaziun. Ina situaziun che Valposchiavo Calcio enconuscha da l'onn passà.
L'emprim gieu da questa primavaira è gia puspè stà in gieu da spitachel. Encunter Romanshorn manavan ils Puschlavins cun 2:0 fin la 84avla minuta. La fin finala hai tuttina mo tanschì per in punct. Romanshorn ha egualisà en la 95avla minuta.
2. liga interregiunala
La meglra equipa grischuna è Cuira 97 che dat en la tschintgavla auta liga en Svizra. Miraclas n'èsi dentant betg da spetgar da l'equipa da la chapitala. La finamira sto esser da tegnair la liga, quai che na sa chapescha betg da sez. Questa liga è cumpetitiva ed gulivada. Quai mussa er il sguard sin la tabella. Actualmain è l'equipa dal trenader Aleksandar Zarkovic sin plazza 7 da la tabella cun quatter puncts avantatg sin il stritg. L'emprima partida da la runda da primavaira ha Cuira pers cun 0:1 encunter Dübendorf e la segunda gudagnà cun 1:0 encunter Uster.
Impurtant per l'equipa giuvna da Cuira 97 è, sper tegnair la liga, da rimnar vinavant experientschas en questa liga e da far il proxim pass quai che pertutga il dar ballape. Per il ballape grischun èsi en mintga cas impurtant che Cuira resta vinavant almain en la 2. liga interregiunala.