CB Lumnezia e CB Surses - Missiun promoziun terza liga

La primavaira ha cumenzà e cun ella cumenza era la runda da primavaira dal campiunadi da ballape en las ligas regiunalas pli bassas. Ord vista rumantscha empermetta il cumbat da promoziun en terza liga per tensiun – cun il CB Lumnezia ed il CB Surses ch'han giugà in'excellenta runda l'atun. Omadus han pers mo in sulet gieu. Uschia ch'ils Lumnezians ed ils Sursetters èn ids cun tuttina blers puncts en la pausa d'enviern. Il CB Lumnezia, grazia a la meglra differenza da gols, salida da l'emprim plaz. Cun lur total 24 puncts han ils dus clubs rumantschs in confortabel avantatg da set puncts sin ils terzs da Tusaun/Cazas.

Ils trenaders davart la missiun promoziun

L'ultima giada ch'il CB Lumnezia ha giugà en terza liga è stà la stagiun 2021/2022. Ma a la fin da questa èsi puspè ì engiu en la quarta. Dumagnar la promoziun en la quarta, restar ina stagiun en terza e lura puspè vegnir relegads è era gia capità al club da la Lumnezia la stagiun 2018/19. Ed uss è il club sin buna via da puspè far il pass si en terza liga.

Merits, ch'il club è sa sviluppà vinavant, ha tschert era Marco Blumenthal. Igl è stà amez la stagiun 2022/23 ch'el ha surpiglià sco trenader. Cun ina filosofia in pau differenta, raquinta Blumenthal, ch'ha en ses temp sco activ giugà numerus onns en segunda liga tar Panaduz e Domat.

Tenor il trenader dovri ina solida e stabila defensiun. Sin in bun fundament che funcziunia possian ins lura bajegiar si tut il rest. Pli stabila che l'equipa davosvart saja e pli tgunsch ch'i giaja davantvart. Ed in bun fundament saja garant per far frunt ed evitar blessuras, surtut grevas blessuras. E da quellas n'hajan ses giugaders lura era betg gì, perquai ch'ins haja trenà bain e filà vi dal fundament. Dar in bel e cultivà ballape e pass per pass era sa sviluppar tecnicamain. Els sajan creschids emna per emna cun pitschens pass, di Marco Blumenthal guardond enavos. E tut quai ch'el vesa sco impurtant è stà il cas. Il CB Lumnezia è vegnì tras la runda d'atun senza blessads. Ha sajettà 36 gols e laschà far be 9. Quai mussa che tant l'offensiva sco era la defensiva constattan.

La promoziun n'ha mai gì emprima prioritad

Per pudair lavurar bain dovri finamiras. Era sche l'equipa ha il potenzial, saja mai vegnì mess sco emprima finamira da far il pass si en terza liga. Uss èn ils Lumnezians dentant sin buna via da dumagnar la promoziun. En quest mument che la terza liga daventa realitad, dependi tge ch'ils giugadurs arrivads e da tschep fan. Quels ch'han gia dà terza liga en il passà e ch'han gì da superar igl ir ensi e gist puspè turnar engiu. Tenor il trenader Marco Blumenthal vegni ad esser decisiv co ses cader sa preschenta la finala. Ma quai saja uss memia baud da tematisar. Uss ina giada laschar cumenzar la runda da primavaira en quarta liga.

Inqual impressiun ed acziun

Il CB Surses pudess far in regal spezial per il giubileum da 45 onns

Laschar cumenzar e lura guardar, quai è era la devisa dal trenader dal CB Surses, Flurin Demarmels. Els avevan gì mess sco finamira il cumenzament da la stagiun da terminar il campiunadi tranter las meglras trais equipas en questa liga. Uss èn els sin il segund plaz, cun tuttina blers puncts sco ils Lumnezians e la promoziun magari realistica. Quella po daventar tema, surtut sch'i va als Sursetters en la runda da primavaira uschè bain sco l'atun. Lura han ins pers mo in sulet gieu (encunter Tusaun-Cazas).

Ch'igl è ì uschè bain saja stà in pau ina surpraisa, raquinta il trenader. Cunquai ch'ins ha gì prendì da nov sis juniors A en il cader, na savevian ins betg propi nua ch'ins stettia. Ma quels juniors hajan dà schlantsch a l'entira equipa ed era fatg in pau squitsch als giugaders rutinads e da tschep. Ina buna maschaida, che haja purtà il CB Surses da victoria a victoria.

En l'istorgia dal club che festivescha quest onn ses giubileum da 45 onns, ha il CB Surses pir ina giada dumagnà la promoziun si en terza. Quai è stà la primavaira 2021. E sco lur rivals directs da la Lumnezia, èsi era per ils Sursetters suenter be ina stagiun puspè ì retour en quarta. E sco tar ils Lumnezians cun Marco Blumenthal, ha tar il CB Surses Flurin Demarmels surpiglià la funcziun da trenader amez la stagiun 2022/23. Cun ses 29 onns è Demarmels in trenader magari giuven. In ch'enconuscha fitg bain ils giugadurs, cunquai ch'el ha giugà onns ed onns ensemen cun els. Uss dirigia el il club davent da la lingia. Dapi questa stagiun survegn el sustegn da dus assistents. Niclo Devonas (anteriur goli che trenescha uss ils golis) e Nicolas Margreth. Flurin Demarmels di ch'el haja in bun dun e tun dad ir enturn cun sia truppa. Fatg in pau pli simpel haja dentant era il vast cader (25 activs) cun bunas annadas e buns giugaders.

Gieu decisiv CB Lumnezia – CB Surses?

Il sulet gieu ch'ils Lumnezians han pers en la runda d'atun è sta ordaifer encunter il CB Surses. Quai cun 0:1. Il trenader dals Lumnezians è magari persvadì ch'en il gieu da return, sin lur plazza da ballape a Vella, na vegnian ils Sursetters a guadagnar nagins puncts. Tensiun è tutta chaussa garantida. Tantpli che quai duel è pir vers la fin dal campiunadi (24 da matg) e pudess, tut tenor sco ch'igl è ì als dus clubs fin lura, en lur «missiun promoziun» esser magari decisiv. E forsa anc quai en connex cun la dumonda per tgi vai la finala propi ensi. Il CB Surses pudess cun dumagnar la promoziun far in regal tut spezial per il giubileum da 45 onns ch'il club po festivar quest onn.