Anc stat in gieu sin il program per Valposchiavo Calcio quest'atun. Ma tuttina pon ins gia resumar ch'ils Puschlavins èn l'equipa da surpraisa en la 2. liga regiunala. Suenter la promoziun da la terza liga en segunda liga, han ils pli paucs spetgà che l'equipa dal sid dal chantun Grischun vegn da fitgar pe cun ils pli ferms adversaris. Il sguard sin la tabella mussa dentant che l'equipa rutinada sa senta bain en la liga pli auta. Actualmain plazza 6 da 14 equipas. En 12 gieus hai dà tschintg victorias per Valposchiavo Calcio.
Fatg è dentant era che la 2. liga regiunala è ina liga fitg guliva. Uschia è l'avantatg sin il stritg mo quatter puncts. Proxima sonda sto Valposchiavo dentant anc prender suenter in gieu ch'èra vegnì spustà. Là han els puspè la schanza d'engrondir l'avantatg sin il stritg.
Impressiuns da gieus da Valposchiavo Calcio
-
Bild 1 von 5Legenda: L'equipa da Valposchiavo Calcio da la stagiun 2023/2024. Valposchiavo Calcio -
Bild 2 von 5Legenda: Cun ses 21 onns èsi per Lorenzo Tuena l'emprim onn sco dumber 1 en il gol da Valposchiavo Calcio. Valposchiavo Calcio
-
Bild 3 von 5Legenda: Tradiziunalmain è Valposchiavo Calcio ina ferma equipa da chasa. Ma trais da las tschintg victorias da campiunadi quest'atun èn grategiadas ordaifer als Puschlavins. Valposchiavo Calcio
-
Bild 4 von 5Legenda: Daniele Rossi è cun ses 20 onns in dals giuvens giugaders en l'equipa. Valposchiavo Calcio
-
Bild 5 von 5Legenda: La gronda part da ses gieus da chasa ha Valposchiavo Calcio dà quest'atun a Campascio. Valpsochiavo Calcio
Gronda rutina e bun spiert d'equipa
Motivs per questa paraula puschlavina pon ins chattar in zic dapertut. Segirafranc è l'equipa fitg rutinada cun plirs giugaders sco Nicolo Pola (32), Valerio Plozza (35) Massimiliano Fiorina (32) u Mattia Merlo (33) che han gia dà tar autras equipas sin quest nivel u perfin anc pli aut. Ina fitg gronda rolla gioga dentant er il spert d'equipa. Fitg blers giugaders èn durant l'emna a Cuira u insanua en la Bassa. E tuttina fan els il sforz d'adina puspè turnar enavos en la vallada. In exempel il goli Lorenzo Tuena (21) che studegia a Turitg e che di che Valposchiavo Calcio saja tut per el.
Dar ballape cun Valposchiavo Calcio è dapli ch'in hobi. Igl è passiun.
Per blers giugaders che n'èn betg pli da chasa en la val, è il club da ballape ina pussaivladad da tuttina restar en contact cun il Puschlav. En il club da Valposchiavo Calcio chattan ins pliras persunas che vivan per il club. Tranter quels tutga er il president Renato Cirolo, ch'è dapi il 2017 al timun dal club. Part da la famiglia da Valposchiavo Calcio saja el dentant gia dapi var 50 onns. El saja stà giugader, trenader da pliras equipas ed uss president.
Per mai è Valposchiavo Calcio mia segunda famiglia
Per il president èsi cler: I saja da giudair il mument. Actualmain saja in spezial temp per il club e quai percorschian ins era en l'entira val. Adina dapli fans visitan ils gieus ed er en ils vitgs da la Val Puschlav vegni discurrì dapli davart Valposchiavo Calcio, raquinta Renato Cirolo. Ins sappia propi di ch'i regia ina tscherta euforia. Plinavant sajan tar ils gieus ordaifer era fitg savens «Puschlavins dal cor» da la partida a guardar ils gieus.
Ch'ils temps vegnan a sa midar, baud u tard, è dentant cler per tut las persunas ch'èn colliadas cun il club. Sur pli lung temp vegni grev da tegnair l'equipa en 2. liga. Blers giugaders da tschep èn gia sur 30 onns ed igl è da quintar che quels chalan bainbaud cun il dar ballape. Ma, apunta: Ils Puschlavins giaudan il mument.