Cape Epic 2025 - Triumf per Nino Schurter e Filippo Colombo

In di suenter avair pers bler temp en il classament general, han Nino Schurter e Filippo Colombo mussà ina reacziun al davos di da cursa e laschà davos els ils gronds concurrents, il duo talian cun Luca Braidot e Simone Avondetto.

Rangaziun Cape Epic 2025

1. Nino Schurter (SUI) e Filippo Colombo (SUI), 23:12:39 uras
2. Luca Braidot (ITA) e Simone Avondetto (ITA), +1:31 minutas
3. Marco Joubert (RSA) e Tristan Nortje (RSA), +12:58 minutas

Tar l’emprima ascensiun han Nino Schurter e Filippo Colombo l’emprim stuì sa defender encunter Braidot ed Avondetto ch’han pliras giadas attatgà ed empruvà da sa distanziar dals Svizzers. Schurter e Colombo han però mintgamai pudì reagir e restar sin ils chaltgogns als Talians. Pli tard han Schurter e Colombo sez attatgà e pudì scappar da la concurrenza. Bun tschintg kilometers avant la fin han lura dentant ils Tudestgs Lukas Baum e Georg Egger pudì surpassar il Svizzers ed uschia festivà l’emprima victoria a quest Cape Epic 2025. Schurter e Colombo han terminà l’etappa sin il segund plaz cun in retard da 39 secundas. Luca Braidot e Simone Avondetto ch’han gudagnà gist trais etappas a questa ediziun 2025 han en l’etappa finala stuì sa cuntentar cun il 6avel plaz cun in retard da 1:38 minutas.

Resultats Cape Epic 2025

Pervia da l’aura extrema durant la notg è l’etappa finala vegnida scursanida sin bun 40 kilometers cun 1'150 meters differenza d'autezza (ruta originala 64 km cun 2'100 m). Er la partenza è vegnida spustada per passa duas uras.

Ursin Spescha terminescha il Cape Epic sut ils top 20

Il segund mountainbiker rumantsch al Cape Epic, Ursin Spescha da Sevgein, ha terminà questa cursa che vala sco la pli dira e pretensiusa cursa da mountainbike dal mund, sin il 18avel plaz dal classament general. Ensemen cun ses collega sidafrican Daniel van der Walt han els la finala pers sur quels otg dis 1:45:37 uras sin Schurter e Colombo.

L’etappa finala han Spescha e van der Walt terminà sin il 25avel plaz cun in retard dad 8:23 minutas.

Ursin Spescha è stà per l’emprima giada a la partenza dal Cape Epic. Per el è uschia er in siemi ì en vigur tar ina da sias davosas cursas sco profi da mountainbike. Uss resta el anc in temp en l’Africa dal Sid per far vacanzas ensemen cun sia famiglia.

Langvad cun in nov record

Annika Langvad dal Danemarc e l’Argentina Sofia Gomez Villafane gudognan il Cape Epic 2015 tar las dunnas, quai cun in avantatg da 21:32 minutas sin Vera Looser da la Namibia e l’Americana Alexis Skarda. Alessia Nay da Zizers terminescha questa cursa sin il 8avel plaz dal classament general. Ella è stada a la partenza cun la Svizra Irina Lützelschwab. La davosa etappa han gudagnà la Columbiana Monica Yuliana Calderon Martinez e l’Ollandaisa Tessa Kortekaas.

Grazia a questa victoria al Cape Epic è Annika Langvad s'avanzada tar la victura da record. La mountainbikera da 41 onns, campiunessa mundiala da cross-country il 2016, ha uss gudagnà 6 giadas questa cursa d'etappas en l'Africa dal Sid ed uschia ina giada dapli ch'il Svizzer Christoph Sauser ed il Tudestg Karl Platt.

Impressiuns dal Cape Epic 2025

ETAPPA 6: Schurter e Colombo han da morder

Drama en la 6avla etappa dal Cape Epic en l’Africa dal Sid: Nino Schurter e Filippo Colombo han gì da morder e la finala defendì be per paucas secundas il «maillot jaune».

Bun 20 kilometers avant l’arrivada da l’etappa sur 87 kilometers cun 2550 meters differenza d’autezza han ils Talians Luca Braidot e Simone Avondetto attatgà. Ils sulets ch’han pudì restar sin il chaltgogns al duo talian èn stads ils Sidafricans Marco Joubert e Tristan Nortje, ils terzs en il classament general. Schurter e Colombo han en quest mument pers il contact, cunzunt er perquai ch’il Tessinais è questa giada stà al limit. Per l’emprima giada dapi l’etappa 1 han Nino Schurter e Filippo Colombo stuì cumbatter vehementamain per pudair restar a la testa dal classament general. Grazia al tempo da Nino Schurter è quai reussì. Ils Svizzers han dentant pers bler temp.

Gudagnà l’etappa han la finala ils Sidafricans Joubert e Nortje ch’han attatgà paucs kilometers avant l’arrivada ed er profità d’in pitschen incap da Braidot ed Avondetto ch’han pers 14 secundas. Schurter e Colombo han cuntanschì l'arrivada sco terzs cun in retard da 1:34 minutas.

I spetga in’etappa finala cun gronda tensiun

En il classament general restan Nino Schurter e Filippo Colombo a la testa. Lur avantatg avant l’etappa finala dal Cape Epic munta dentant be a 32 secundas. I spetga uschia ina davosa etappa dramatica. Il duo talian Luca Braidot e Simone Avondetto vegn a far tut il pussibel dad er distanziar ils Svizzers la dumengia. Per Schurter e Colombo vali da sa revegnir uschè svelt sco pussibel ed anc ina giada mobilisar tut las forzas per defender questa emprima posiziun sin ils davos 64 kilometers cun 2100 meters differenza d’autezza en la regiun da Somerset West.

Spescha e van der Walt fitg contant

Il duo svizzer-sidafrican cun Ursin Spescha da Sevgein e Daniel van der Walt han pers en questa segunda davosa etappa 21:29 minutas sin ils pli sperts e terminà l’etappa sco 21avel. En il classament general èn Spescha e van der Walt da nov sin plaz 19 cun in retard da 1:37.53 minutas sil leaders Schurter e Colombo.

Premiera tar las dunnas d’elita

Per l’emprima giada a questa Cape Epic n’han betg Annika Langvad dal Danemarc e l’Argentina Sofia Gomez Villafane gudagnà l’etappa, mabain la Columbiana Monica Yuliana Calderon Martinez e l’Ollandaisa Tessa Kortekaas, las quartas dal classament general. Ellas han battì las grondas dominaturas da quest Cape Epic per 6:40 minutas. En il classament general resta il duo Langvad e Gomez Villafane suveran a la testa cun in avantatg da 23:26 minutas sin Vera Looser da la Namibia e l’Americana Alexis Skarda.

Ursin Spescha ha survegnì support da la famiglia

Sis dad otg etappas èn dumagnadas per Ursin Spescha e ses collega Daniel van der Walt ch’ha da morder in zic a quest Cape Epic, ina cursa tar el avant isch-chasa. Per las davosas etappas survegn il duo svizzer-sidafrican però anc sustegn dals geniturs dad Ursin, Armin ed Eveline Spescha, e da sia amia ch’han fatg il viadi vers l’Africa dal Sid per persequitar la cursa d’Ursin al lieu.

Per Ursin èsi ina da las davosas cursas sco profi. Uschia giaja er a fin ina lunga istorgia da famiglia, di il bab Armin. Ursin va cun velo dapi 22 onns, in temp fitg intensiv, er per l’entira famiglia. Ed uschia hajan els vulì accumpagnar Ursin sin quest davos viadi di Armin Spescha vinavant. Suenter il Cape Epic fetschian els uschia er anc ensemen in’emna vacanzas en l’Africa dal Sid cun far in viadi tras quest pajais.

ETAPPA 5: Schurter e Colombo gudognan etappa roiala

Nino Schurter e Filippo Colombo han fatg in ulteriur pass direcziun triumf al Cape Epic 2025. Il dus mountainbikers svizzers han gudagnà l’etappa roiala sur 98 kilometers cun 2850 meters differenza d’autezza da Paarl vers il sid a Somerset West. Els han partì en fitg bain la cursa ed encunter la fin da la davosa ascensiun pudì scappar da la concurrenza. Sin ils davos bun 10 kilometers a val han ils dus spezialists da cross-country mussà lur qualitads tecnicas e laschà nagina schanza a las autras equipas da far bun temp. La finala han Schurter e Colombo cuntanschì l’arrivada cun in avantatg da 1:10 minutas sin ils gronds rivals en questa cursa extrema, il duo talian cun Luca Braidot e Simone Avondetto.

Cumplettà il podest sco terzs han ils Sidafricans Marco Joubert e Tristan Nortje ch’han attatgà gia baud e per part manà la cursa cun in avantatg dad ina minuta e mesa. La finala han ils Sidafricans pers passa trais minutas.

Grazia a questa victoria, la secunda suenter avair gudagnà l’etappa 1, han Nino Schurter e Filippo Colombo er pudì augmentar l’avantatg en il classament general. Da nov mainan ils Svizzers il classament cun 1:52 minutas avantatg sin Luca Braidot e Simone Avondetto. Cunquai è Nino Schurter sin buna via da gudagnar per la terza giada il Cape Epic suenter il 2017 cun Matthias Stirnemann ed il 2019 cun Lars Forster. I restan dentant anc duas etappas.

Spescha e van der Walt vegnan 25avels

Ursin Spescha da Sevgein e ses collega sidafrican Daniel van der Walt han pers en questa etappa roiala sur bunamain 100 kilometers 24:46 minutas sin Schurter e Colombo e terminà l’etappa sin plaz 25. En il classament general crodan Spescha e van der Walt puspè ord ils top 20. Sco 21avels han els in retard da 1:17.58 uras sin ils leaders svizzers.

Tar las dunnas Langvad e Gomez Villafane – tgi auter

Annika Langvad dal Danemarc e l’Argentina Sofia Gomez Villafane han er gudagnà la 5avla etappa roiala, questa giada però be cun in avantatg da 12 secundas sin la Columbiana Monica Yuliana Calderon Martinez e l’Ollandaisa Tesse Kortekaas. Tut las autras bunamain otg minutas e dapli. Alessia Nay da Zizers ha ensemen cun Irina Lützelschwab schizunt pers passa 20 minutas, quai sco 8avlas.

En il classament general po be pli in defect u in accident franar il duo Langvad e Gomez Villafane. Suenter sis dad otg dis da cursa han ellas in avantatg da 22:30 minutas sin Vera Looser da la Namibia e l’Americana Alexis Skarda.

ETAPPA 4: Schurter e Colombo han tut sut controlla

Nino Schurter e Filippo Colombo han er terminà la quarta etappa sin il podest. Sco il di avant han ils Svizzers pers il sprint final encunter ils Talians Luca Braidot e Simone Avondetto ed uschia terminà l’etappa sin il segund plaz. La finala han quatter teams cumbattì per la victoria. Per Braidot ed Avondetto èsi gia la terza etappa ch’els gudognan a quest Cape Epic. Per ils 80 kilometers cun bun 2000 meters differenza d’autezza en la regiun da Paarl han ils pli sperts duvrà per radund 3 uras.

En il classament general na datti naginas midadas. Il duo Schurter e Colombo restan ils leaders, quai dentant cun in avantatg da be 42 secundas sin il duo talian Braidot ed Avondetto. Ils terzs, ils sidafricans Marco Joubert e Tristan Nortje han gia in retard da bunamain 10 minutas.

Ursin Spescha betg lunsch davent dals megliers

Ina buna prestaziun han er Ursin Spescha da Sevgein e ses collega sidafrican Daniel van der Walt mussà en questa quarta etappa. Els han pers gnanc 10 minutas sin ils victurs e terminà l’etappa sin il 18avel plaz. En il classament general han el uschia gudagnà ina plazza. Da nov èn Spescha e van der Walt 19avels cun in retard da bun 53 minutas.

Langvad e Gomez Villafana cun ulteriura victoria

Tar las dunnas resta er suenter la quarta etappa tut il medem. Annika Langvad dal Danemarc e l’Argentina Sofia Gomez Villafane gudognan er questa etappa cun 50 secundas avantatg sin Vera Looser da la Nambia e l’Americana Alexis Skarda. En il classament general ha il duo Langvad e Gomez Villafane in avantatg da prest 15 minutas sin la concurrenza, quai trais etappas avant la fin dal Cape Epic.

Impressiuns dad Ursin Spescha suenter l'etappa 4

Il venderdi spetga la 5avla etappa, la roiala. Quella maina sur 98 kilometers cun bunamain 3000 meters differenza d’autezza da Paarl vers il sid en la regiun da Somerset West.

ETAPPA 3: Schurter e Colombo perdan sprint final

Nino Schurter e Filippo Colombo restan er suenter la terza etappa ils leaders dal Cape Epic. Il duo svizzer ha terminà l’etappa sur 78 kilometers cun 2'450 meters differenza d’autezza en la regiun da Paarl sin il segund plaz. Els han la finala pers il sprint final encunter ils Talians Luca Braidot e Simone Avondetto ch’èn uschia stads ina secunda pli sperts.

Tut ils auters gronds concurrents en il cumbat per la victoria al Cape Epic 2025 han pers pliras minutas. Persvadì en questa terza etappa ha cunzunt er il svizzer Marc Stutzmann. Ensemen cun il Talian Samuele Porro ha el cuntanschì l'arrivada sco quart cun in retard da 2:31 minutas.

Ursin Spescha sut ils top 20

Ina buna prestaziun han er Ursin Spescha e ses collega sidafrican Daniel van der Walt mussà durant questa etappa ch’ha cumenzà in zic pli baud la damaun pervia da la chalira. Els han terminà l’etappa sin il 19avel plaz cun in retard da 15:19 minutas. En il classament general han els cunquai pudì far in pass sut ils top 20. Sco 20avels han Spescha e van der Walt in retard da 43:19 minutas sin Nino Schurter e Filippo Colombo che restan a la testa cun in avantatg da 43 secundas sil duo talian Braidot ed Avondetto.

Langvad e Gomez Villafana ina classa per sa sezzas

Tar las dunnas d'elita domineschan Annika Langvad dal Danemarc e l'Argentina Sofia Gomez Villafane vinavant il Cape Epic. En la terza etappa ha quest duo declassà l'entira concurrenza per bunamain tschintg minutas e dapli. Uschia han ellas augmentà vinavant l'avantatg en il classament general da nov sin bun 14 minutas. La grischuna Alessia Nay ed Irina Lützelschwab han pers en l'etappa passa 25 minutas. En il classament general han ellas però gudagnà ina plazza e sa chattan da nov sil il 7avel plaz cun in retard da 53:33 minutas.

ETAPPA 2: Schurter e Colombo defendan il «maillot jaune»

Nino Schurter e Filippo Colombo èn vinavant bun da viadi al Cape Epic. Il duo svizzer ha terminà la segunda etappa sin il segund plaz. En questa etappa, ina cursa encunter l’ura sur 66 kilometers da Durbanville a Paarl, han els pers 27 secundas sin Wout Alleman da la Belgia e Martin Stosek da la Tschechia.

Ils gronds concurrents da Schurter e Colombo, il duo talian Luca Braidot e Simone Avondetto, han pers exact ina minuta. Uschia han Nino Schurter e Filippo Colombo er pudì augmentar l’avantatg en il classament general. Suenter trais dad otg dis da cursa mainan ils Svizzers cun in avantatg da 44 secundas sin ils Talians. Terzs cun in retard da gia 4:32 minutas èn ils Tudestgs Lukas Baum e Georg Egger.

Ursin Spescha fitg datiers dals top 20

Ursin Spescha da Sevgein e ses collega sidafrican Daniel van der Walt han pers 8:01 minutas en questa emprima cursa cunter l’ura insumma en l’istorgia dal Cape Epic ed uschia classads sin plazza 21. Er en il classament general sa chattan els sin questa plazza cun in retard da 28:01 minutas.

Langvad e Gomez Villafane betg da franar

Tar las dunnas domineschan vinavant Annika Langvad dal Danemarc e l’Argentina Sofia Gomez Villafane. Las favuritas han er gudagnà l’etappa 2 e battì en questa cursa encunter l’ura l’entira concurrenza per duas minutas e dapli. Alessia Nay da Zizers ed Irina Lützelschwab han sco 6avlas gia pers 7:42 minutas en questa etappa sur 66 kilometers. En il classament general maina il duo Langvad e Gomez Villafane cun in avantatg da prest 10 minutas.

Impressiuns dad Ursin Spescha durant l'etappa 2

ETAPPA 1: Schurter e Colombo ils novs leaders

Il duo svizzer ha gudagnà l’emprima etappa e surpiglià la testa en il classament general suenter dus dad otg dis.

Nino Schurter e Filippo Colombo han battì per 31 secundas ils Talians Luca Braidot e Simone Avondetto ch'avevan triumfà il di avant en il prolog, quai malgrà ch’ils Svizzers han pers in zic il contact cun ils Talians tar la davosa ascensiun. Sin ils davos kilometers han Schurter e Colombo lura attatgà e pudì sa distanziar da Braidot ed Avondetto.

Sco terzs han cuntanschì l’arrivada il duo tudestg cun Lukas Baum e Georg Egger, quai cun in retard da bun duas minutas.

Spescha e van der Walt crodan enavos

Ursin Spescha e ses collega sidafrican Daniel van der Walt han pers 17:30 minutas, ed èn vegnids 22avels en questa etappa che vala sco ina da las pli lungas e diras a quest Cape Epic 2025.

En il classament general han Nino Schurter e Filippo Colombo surpiglià la testa. Els partan dentant il mardi cun in avantatg da be 11 secundas sin Luca Braidot e Simone Avondetto. Ursin Spescha e Daniel van der Walt sa chattan sin posiziun 22 cun in retard da 20:27 minutas.

Impressiuns dad Ursin Spescha durant l'etappa 1

Alessia Nay sut las top 10

Tar las dunnas han Annika Langvad dal Danemarc e l’Argentina Sofia Gomez Villafane er dominà l’emprima etappa e cuntanschì l’arrivada cun in avantatg da bunamain sis minutas sin Vera Looser da la Nambia e l’Americana Alexis Skarda. Alessia Nay da Zizers ed Irina Lützelschwab han sco 7avlas pers 16:34 minutas. En il classament general maina il duo Langvad e Gomez Villafana cun in avantatg da set minutas.

PROLOG: duo Schurter e Colombo persvadan

Partenza gartegiada per Nino Schurter e Filippo Colombo al Cape Epic en l’Africa dal Sid. Il duo svizzer che tutga franc tar ils gronds favurits ha terminà l’emprima etappa da questa cursa extrema sur otg dis sin il segund plaz. Ils dus mountainbikers dal Team Scott-Sram MTB Racing han pers be 20 secundas sin ils Talians Luca Braidot e Simone Avondetto.

Stuì sa cuntentar be cun il 9avel plaz ha il Sidafrican Matthew Beers ch’ha triumfà ils davos dus onns a questa cursa che vegn era numnada il Tour de France dals mountainbikers. Ensemen cun l’American ha Beers pers en il prolog sur 26 kilometers 2:33 minutas.

Ursin Spescha datiers dals top 10

Il mountainbiker sursilvan ch’è per l’emprima giada insumma a la partenza dal Cape Epic, ha ensemen cun il Sidafrican Daniel van der Walt terminà il prolog sin il 13avel plaz – cun in retard da be 3:17 minutas sin il duo talian Braidot ed Avondetto.

Impressiuns dad Ursin Spescha durant il prolog

Las pli spertas dunnas d’elita èn stadas Annika Langvad dal Danemarc ensemen cun l’Argentina Sofia Gomez Villafane. Ina buna prestaziun han era las Svizras Irina Lützelschwab ed Alessia Nay da Zizers mussà. Ellas èn vegnidas 6avlas en quest prolog a Durbanville cun in retard da 4:01 minutas.