Il duo lumnezian ha pudì realisar il siemi da terminar il Cape Epic che vala sco la pli dira cursa da mountainbike insumma e che vegn perquai er numnada il Tour de France dals mountainbikers. Ma sco gia tar lur premiera il 2022 n’èsi er questa giada betg ì tut sco giavischà. Pervia da problems cun il magun ha Ronny Cavegn stuì laschar ora la terza etappa.
Nus essan cuntents e fitg satisfatgs, er da quai che nus avain dastgà emprender ils davos onns per quest project Cape Epic.
Las emoziuns èn stadas grondas suenter avair cuntanschì l’arrivada da l’etappa finala a Stellenbosch. Norbert e Ronny Cavegn han numnadamain investì bler temp en questa cursa ed ils davos onns er trenà fitg e conscienzius tenor in plan da trenament, quai che saja tenor ils Lumnezians la finala stà ina clav da success.
