Cape Epic 2025 - Ursin Spescha: «Jau ma legrel extrem»

Ursin Spescha (26) da Sevgein sa participescha quest onn per l’emprima giada al Cape Epic en l’Africa dal Sid, quai ensemen cun il Sidafrican Daniel van der Walt. Per il mountainbiker Sursilvan èsi medemamain ina da las davosas cursas ch’el parta sco profi. En l’avegnir vul el però anc far intginas cursas da maraton, cursas da distanza lunga che giaschian meglier ad el.

Preparaziun miniziusa

Ursin Spescha è sa preparà minuziusamain sin questa cursa extrema en l’Africa dal Sid, ina cursa che vegn savens er numnada il Tour de France dals mountainbikers. Gia la fin da l’onn passà sco er il schaner è el stà duas giadas giudim l’Africa per trenar ensemen cun ses collega Daniel van der Walt. Ensemen han els er fatg part a diversas cursas, tranter auter al Tankwa Trek, ina cursa sumeglianta al Cape Epic sur quatter dis. Questa cursa han els la finala terminà sin il terz plaz dal classament general.

Er a Wollerau en il chantun Sviz nua che Ursin Spescha abitescha ensemen cun l’anteriur mountainbiker Silas Valaulta da Domat e Mauro Schmid, ciclist da l’equipa naziunala, ha el fatg tut il pussibel da sa preparar optimal sin quest Cape Epic. Uschia ha Spescha per exempel er adina puspè trenà sin la rolla a chasa cun resti d’enviern e cun avair tschentà en il stgaudament per uschia simular la chalira ch’i po esser da quest temp en l’Africa dal Sid.

Cape Epic – la pli dira e pretensiusa cursa da mtb dal mund

Mintga detagl quinta

Ed er cunter la sfida cun l’igiena en l’Africa dal Sid, che procura che bleras participantas e participants han onn per onn problems cun il magun durant questa cursa, ha Ursin Spescha fatg tut il pussibel che quai na capitia a ses team. Durant la cursa han els uschia lur agens posts cun bavrondas e durmì vegn ils emprims dis tar la famiglia van der Walt a Durbansville nua ch’il Cape Epic cumenza, silsuenter hajan els fittà ina chasa. Ursin Spescha e Daniel van der Walt han er in agen mecanist e fisioterapeut. Sulet il cuschinar stoppian els far sez, ma quai fetschia el gugent, di Ursin Spescha. I na vegnia dentant betg a dar gronds menus. Il pli savens dettia u pasta ni ris cun sosas ch’i saja sulet da stgaudar, quai na haja pia betg da far grond cun cuschinar manegia il Sursilvan. Impurtant saja dentant da vair il dretg nutriment sin maisa per lura avair avunda energia er per il proxim di.

La finamira dal duo Ursin Spescha e Daniel van der Walt che partan sut il num «Computer Mania Cannondale» è da dumagnar durant in’etappa il pass sin il podest. En il classament general emprovan els da sa classar sut ils top 10.

Schurter e Colombo han en mira la victoria

Tranter ils gronds favurits tutga il duo svizzer cun Nino Schurter e Filippo Colombo. Ils dus collegas d’equipa tar «Scott-Sram MTB Racing Team» partan per l’emprima giada ensemen a questa cursa da prestige che Schurter ha gudagnà il 2017 cun Matthias Stirnemann ed il 2019 cun Lars Forster. Er tranter ils favurits s'audan il Bernais Marc Stutzmann che va a la partenza cun il Talian Samuele Porro. Stutzmann aveva gudagnà il 2023 il Swiss Epic. Er il victur dals davos dus onns, il Sidafrican Matthew Beers, è danovamain a la partenza. Quest onn attatga il mattadur local ensemen cun l’American Keegan Swenson.

Betg a la partenza en las victuras da l’onn passà, la Svizra Nicole Koller che veva gudagnà ensemen cun l’Ollandaisa Anne Terpstra tut las etappas ed uschia er il classament general. Cun ambiziuns sin in plaz da podest parta però Alessia Nay da Zizers ensemen cun Irina Lützelschwab, duas spezialistas da maraton.

603 kilometers e 16'500 meters differenza d'autezza

Il Cape Epic 2025 cumenza la dumengia, ils 16 da mars cun in prolog e va a fin in'emna pli tard, ils 23 da mars. Tut en tut èsi da surmuntar durant ils otg dis da cursa 603 kilometers cun radund 16’500 meters differenza d’autezza. Las emprimas etappas vegnan manadas atras en la regiun da Durbanville, silsuenter vai vinavant cun intginas etappas a Paarl ed a fin va il Cape Epic a Somerset West, tut regiuns en l’ost da Kapstadt.