Turbulenzas a la bursa - Pertge che las cassas da pensiun restan entant calmas

Fertant che grondas fluctuaziuns fan tema a tscherts investiders, resta Stephan Skaanes, l'expert d'investiziun da las cassas da pensiun tar il biro ppcMetrics, quiet.

Che las cassas da pensiun pon tegnair ora quai haja oravant tut dus motivs: per l'ina investeschan las cassas da pensiun a moda vasta, pia betg mo en aczias, mabain er en obligaziuns ed en immobiglias. Ultra da quai procuran ellas cun las uschenumnadas reservas da fluctuaziun da la valur per reservas. Quellas èn in puffer per in tal si e giu, sco quai ch'i dat actualmain a la bursa. Sch’ina cassa da pensiun haja in fitg bun onn d’aczias, na vegnia betg l’entira facultad repartida en furma da tschains a las persunas assicuradas, di Skaanes. «Ina part vegn retegnida en la cassa da pensiun.»

L’onn passà han las cassas da pensiun per exempel cuntanschì fitg bunas renditas ed han pudì augmentar lur reservas.

Privel: tschains pli bass

Tuttina èn las cassas da pensiun alertas. Sche la malsegirezza cuntinuescha, pudess la Banca naziunala svizra (BNS) sbassar ils tschains. Il passà mussa che quai pudess davantar in problem per las cassas da pensiun. Ils onns dal 2015 fin il 2022, cura ch'ils tschains eran pli ditg negativs, èn quai stads onns fitg difficils per las cassas da pensiun.

I pudess pia gia prest ir en questa direcziun, suppona Skaanes. En la crisa actuala vegnia numnadamain puspè dumandà fermamain il franc svizzer, perquai ch'el vala sco port segir per investiders.

La BNS pudess esser sfurzada da sbassar ils tschains

«Interpresas svizras pudessan survegnir problems cun dazis pervi da la politica da Donald Trump. Ed er il ferm francs svizzer è in problem», di Skaanes. Sche quai fiss il cas, na vegnia la Banca naziunala svizra forsa betg a restar inactiva e sbassa probabel vinavant ils tschains – sin nulla u schizunt sut nulla, di l'expert da cassas da pensiun.