Dapi ch'il president Donald Trump ha publitgà ils dazis ch'ils Stadis Unids da l'America pretendan per pudair importar rauba, van las bursas pe zop. E quai als martgads d’aczias sin l'entir mund.
Era l'index svizzer SMI ha serrà il venderdi en il minus - ed il glindesdi puspè avert anc pli fitg en il minus. Il SMI ha pers radund 8%.
Las pli grondas perditas hai dà tar l'intermediader da persunal Adecco, però era tar la Partners Group, e tar las bancas UBS e Julius Bär. Questa vaglia ha pers 8-9%. La Swiss Life ha pers 7%. Era la vaglia da rauba da luxus ha patì sco Richemont u era Swatch. E schegea che la branscha da farma è para exclusa dals dazis, han Novartis (-5,4%) e Roche (-6,7%) era pers remartgabel.
Da l'autra vart ha la vaglia plitost defensiva sco Lindt&Sprüngli, Swisscom e Sonova pers main.
Uschia è l'index da la bursa Svizra (SMI) ì massiv a val. Uschè fitg ch'el è sut il stan da l'entschatta da quest onn, ed era pli bass che durant l'entir onn passà.
Sco raschun ch'ils investiders vendan puspè lur vaglia da ristga e laschan crudar ils curs, inditgeschan ils experts la tema d'ina recessiun. Ina tema che saja vegnida intensivada cun ils dazis auts. Quai tant dals Stadis Unids, però era ils cuntradazis che la China ha annunzià.
Sco trend actual vegn constatà ch'ils investiders bandunan vaglia cun dapli ristga sco aczias, ed investeschan en emprests da stadi.
Betg mo investiders pertutgads
Las turbulenzas a la bursa sentan era las cassas da pensiun svizras. Ellas administreschan passa 1'000 milliardas francs – e circa in terz han ellas investì en aczias da tut il mund. Tenor Tashi Cumbatshang, expert da facultad e prevenziun per la vegliadetgna tar la banca Raiffeisen, na duessan las sperditas a las bursas dentant betg avair consequenzas immediatas per las rentas.
Per las bleras persunas saja il spargnar per la vegliadetgna ina chaussa a lunga vista. Perquai n'hajan turbulenzas sco ussa betg fitg grondas consequenzas. Datti ina recessiun, pudess quai dentant sa midar. Mo per il mument na quintian els betg cun ina tala, las prognosas per la conjunctura da la Svizra hajan els dentant stuì sbassar, di Tashi Gumbatshang.
Restar calm e betg agir cun prescha
Tashi Cumbatshang cusseglia perquai da na betg sa laschar diriger da las emoziuns, mabain da restar calm e da spetgar co la situaziun sa sviluppescha als martgads da finanzas. A lunga vista hajan las investiziuns a la bursa rendì.