Trais dis ha il parlament debattà: pliras fatschentas èn sin il tschancun final. Per exempel la revisiun dal dretg sexual penal . Il Cussegl naziunal ha sa decidì per il principi «na munta na»: Tar in act sexual sto ina persuna explicitamain dir «na», per ch'i vala avant dretgira sco violaziun. Cun in'excepziun: En il project da votaziun èsi scrit che la persuna possia esser en in stadi da schoc (uschenumnà freezing). Sex en ina tala situaziun duai valair sco violaziun. Uss sto il Cussegl dals chantuns decider davart quai.
Chlus duai profitar da cundiziuns favuraivlas
Il Cussegl naziunal ha il davos refusà da tractar l'ovra idraulica Chlus a moda prioritara . En ina nova proposta che vegn tranter auter da Martin Schmid (PLD/GR) duai Chlus tuttina profitar da levgiaments e subvenziuns, dentant senza esser sin la glista. Il Cussegl dals chantuns ha approvà quai, uss va la fatschenta enavos en il Cussegl naziunal. Fin 200 milliuns francs sustegn pudessi dar per la Repower che vul bajegiar l'ovra Chlus.
Stefan Engler ha medemamain gì succes cun ina proposta en il decret general davart l'energia: Sch'i vegn stretg cun l'energia duess il Cussegl federal dastgar schluccar las prescripziuns d' aua restanta sut ovras idraulicas. Uschia valessan en questa situaziun d'ina mancanza d'energia sulet anc las quantitads d'aua restanta minimalas, tenor lescha actuala. Giu da maisa è l 'obligaziun per panels solars sin bajetgs gronds.
Dapli reducziun da premias
Da princip è il Cussegl dals chantuns d'accord ch'ils chantuns duajan en l'avegnir pajar dapli per reducir las premias da las cassas da malsauns. El ha votà per ina cuntraproposta a l' iniziativa per distgargiar las premias da la PS.
Tar la dumonda, quants daners che duain vegnids pajads supplementarmain, èn ils cussegls dentant betg perina. Uschia vul il Cussegl dals chantuns augmentar la cumpart dals chantuns per passa 350 milliuns francs. Il Cussegl federal percunter propona radund 500 milliuns, il Cussegl naziunal vul ch'els pajan supplementarmain enturn 2 milliardas francs.
Iniziativa da franar ils custs da sanadad
Tar intgins detagls datti anc differenzas tranter las chombras per la cuntraproposta da l' iniziativa . Tgi che dastga adattar tariffas antiquadas tar ospitals è per exempel anc dispitaivel. Il coc dal project da votaziun dal parlament è dentant segir: ch'i dat en il futur finamiras per la qualitad ed ils custs dal sistem da sanadad. Tge che duai schabegiar sche quellas mesiras na vegnan betg tegnidas en na stat dentant betg scrit en il project da votaziun fin uss.
PUK, Lex Ucraina, Obligaziun da vaccinar e vias naziunalas
- Il Cussegl naziunal na vul nagina «Lex Ucraina». El ha refusà ina reglamentaziun d’excepziun ch'avess lubì a stadis terz da dar vinavant armas svizras a l’Ucraina. Il Cussegl naziunal ha sbittà in’iniziativa parlamentara da sia cumissiun per la politica da segirezza. L’iniziativa è cun quai giu da maisa. La cumissiun dal Cussegl dals chantuns aveva gia refusà l’idea dad ina «Lex Ucraina».
- Ina maioritad da 140 cunter 35 vuschs en il Cussegl naziunal propona da refusar l'iniziativa dal pievel «Per libertad ed integritad corporala». La cumissiun correspundenta dal Cussegl chattà che l'iniziativa è formulada a moda memia vasta. Ella ha temì che quai chaschunia problems.
- Pliras milliardas per il traffic d'autos: Il Cussegl naziunal ha concedì 5,3 milliardas francs per bajegiar ora la rait da traffic en l'aglomeraziun. In dals projects è in tunnel sut il Rain ora tranter Basilea Citad e Basilea-Champagna. Auters sa chattan en Svizra franzosa, ed en la vischinanza da Berna, Son Gagl, e Schaffusa. La maioritad en il cussegl di che quai saja per reducir las colonnas sin las autostradas. Plinavant ha il Cussegl naziunal concedì per ils proxims onns 8,8 milliardas francs per il manaschi, e per adattaziuns da la rait da vias naziunalas. Sco proxim va la fatschenta en il Cussegl dals chantuns.
- Il biro dal Cussegl naziunal ha decidì il rom per l'inquisiziun en connex cun la surpigliada urgenta da la Credit Suisse tras la UBS. La cumissiun parlamentara d'inquisiziun, curt PUK, vegn incumbensada d'examinar la gestiun dal Cussegl federal, da l'administraziun federala ed auters responsabels tar la Confederaziun. La PUK è l'instrument il pli ferm dal parlament. Talas cumissiuns d'inquisiziun haja fin uss dà be quatter giadas. Quellas vegnan decididas be en cas cun gronda impurtanza e consequenzas gravantas.
