Il Cussegl dals chantuns insista tar la refurma dal dretg penal sexual sin l’uschenumnada soluziun da cuntradicziun, pia sin il princip «na è na». Mardi ha el dentant fatg ina proposta da cumpromiss. Quai munta che la definiziun dal pled «violaziun» duai vegnir schlargiada.
Cun la revisiun vul il parlament adattar il dretg penal sexual als svilups socials dals onns passads. Uschia duain delicts da violenza e delicts sexuals, tar ils quals las victimas èn savens dunnas ed uffants, vegnir chastiads en l’avegnir en moda pli severa.
Il Cussegl naziunal ha insistì l’ultima giada sin la regla «sulet in gea è in gea» che pretenda ch'i dovria avant il sex il consentiment da tut ils involvids. La nova proposta da cumpromiss dal Cussegl dals chantuns vegn pli datiers a questa schliaziun, i restan dentant intginas differenzas tranter als duas chombras. La fatschenta va ussa enavos en il Cussegl naziunal.
Nagina refusaziun n'é betg consentiment
La Chombra pitschna renconuscha che victimas da violenza sexualisada n'èn betg bunas da dir na. Quai perquai ch’els sa chattan en ina sort stadi da schoc, in «freezing». En il futur duai quai medemamain vegnir definì da las dretgiras sco refusaziun.
«Il freezing è en l’avegnir in exempel explicit d’in na verbal», ha ditg Beat Rieder da l’Allianza dal Center. El è da l’opiniun che questa proposta è ina «soluziun stabila». Lisa Mazzone dals Verds ha discurrì d’in «progress impurtant en il dretg penal sexual». Tar il cumpromiss ch’il Cussegl dals chantuns ha acceptà senza opposiziun tutga er che dretgiras pon obligar delinquents da far curs.
