Sin pliras surfatschas sper il territori da skis da Savognin planisescha l'EWZ grondas ovras solaras. Ina en la Val Nandro, in'autra en il vest dal Piz Curvér. En tut duai i dar energia per 50'000 chasadas. La vischnanca, las possessuras dal terren e las pendicularas stettian davos il project, scriva l'EWZ.
In'ulteriura ovra planisescha l'EWZ sin il territori da skis Spleia Tambo sin la Tanatzhöhi. Tut tenor duess quella dar energia per 8'000 chasadas.
La citad Turitg ha gia concedì 1,7 milliuns francs per planisar il project en la Val Nandro. La radunanza communala da Surses sto anc approvar il project.
Betg en territori protegì
Sco che l'EWZ scriva, na sajan las ovras betg planisadas en zonas protegidas naziunalas u chantunalas. La surfatscha per ils panels solars duai vinavant er pudair vegnir nizzegiada per l'economia d'alp.
Cun quai veglia l'EWZ e la citad Turitg contribuir ad energias regenerablas, per l'autra promover l'independenza da la Svizra d'energia da l'exteriur. Tar las ovras solaras tar il lai da fermada Albigna haja gia sa mussà che las ovras alpinas produceschian durant l'enviern 25% dapli energia.
