Questa dumengia da votaziuns na vegnan il Cussegl federal e las partidas burgaisas betg a magunar uschè svelt. La populaziun ha tramess la refurma da la cassa da pensiun da l'aua giu – e quai cun passa 67%. Quai è ina schleppa per las autoritads.
Fabia Caduff
Correspundenta Chasa federala
Fabia Caduff, pertge è il cler Na cun passa 67% a la refurma da las cassas da pensiun ina schleppa per il Cussegl federal e las partidas burgaisas?
Fabia Caduff: Perquai ch'il resultat dad oz mussa ch'ins ha politisà sper ils interess da la populaziun vi. E quai betg mo in pau. In resultat uschè cler è in grond signal vers la politica. Ins sto però era dir ch'igl è in resultat che nagin n'avess spetgà en tala maniera. En mintga cas sch'ins guarda las prognosas ed ils trends da las retschertgas fatgas ordavant.
Interessant è era che la refurma ha pers adina dapli sustegn, pli datiers ch'il di da votaziun è vegnì. Quai è plitost atipic per projects che vegnan dal Cussegl federal e dal parlament. Tipic è plitost che quests gudognan adina dapli sustegn vers la fin dal cumbat da votaziun.
Tge è lura capità – co ha quai pudì vegnir a quai?
Fabia Caduff: Tenor mai datti divers puncts ch'èn s'accumulads. Per l'ina il project sco tal: La refurma da las cassas da pensiun è cumplexa. E sch'ins na chapescha betg propi gist, lura metta il suveran plitost in Na en l'urna - e quai san ins en sasez da votaziuns precedentas, cura ch'igl era materias memia cumplexas ubain era memia vastas. Exempels èn la lescha da chatscha dal 2020, ubain era dal 2020 la refurma da rentas ch'ha fatg naufragi.
A punta – ti dis ch'i sajan s'accumulads plirs puncts. Tgenins han era anc influenzà la votaziun?
Fabia Caduff: Permez la fasa da la campagna per la refurma – l'entschatta d'avust – èsi vegnì enconuschent che las prognosas per la votaziun da l'AVS eran vegnidas calculadas sbagliadas. La furmla per calcular las prognosas per l'AVS cuntegneva in sbagl, uschia che las calculaziuns èn stadas memia autas. Quai ha segir e franc era influenzà la confidenza en las instituziuns. Latiers vegn era che las partidas burgaisas n'han per part betg pudì persvader lur atgna basa da sustegnair la refurma. Surtut tar la Partida populara svizra (PPS) – però era tar l'Allianza dal Center ed ils Verdliberals. Quai ves'ins tar l'ultima retschertga da la SSR SRG ch'i n'èn betg adina stads perina.
E co vai ussa vinavant? Tge munta quai per las cassas da pensiun?
Fabia Caduff: Ils problems, quels restan. Per l'ina n'ha betg mintgin e mintgina ina cassa da pensiun. Persunas cun pajas bassas e persunas che lavuran a temp parzial han anc adina il medem problem. Pertutgadas èn oravant tut dunnas. Però era il svilup che nus vegnin adina pli vegls resta, uschia che las cassas dovran dapli daners per pudair pajar pli ditg la renta da pensiun. E qua resta la dumonda da la finanziaziun – nua ir per quests daners. E quai che resta era èn las fronts politicas – burgais cunter la sanestra. Ed uschia resti vinavant difficil da chattar in cumpromiss politic. La decisiun dad oz pudess dentant esser in mussavia.
