In comité da pliras partidas burgaisas ha lantschà la campagna da votaziun per la refurma da la cassa da pensiun. Per quella saja ura e temp. Cun la refurma creschian las rentas per persunas che lavuran parzialmain e per persunas cun entradas bassas. Da quai profiteschian surtut las dunnas.
Tenor la PPS, la PLD, l’Allianza dal Center, la Partida verd-liberala e la Partida evangelica procura la refurma per dapli giustia tranter las generaziuns e meglras schanzas sin il martgà da lavur per lavurantas e lavurants pli vegls.
La refurma da la lescha davart il provediment professiunal saja in cumpromiss che vegnia sustegnì da fitg blers, scriva il comité. La segunda pitga vegnia rinforzada e la cassa adattada al svilup economic e social.
Gia il fanadur ha in’allianza da dunnas da differentas partidas fatg reclama per in Gea. Part da questa allianza è er la cussegliera dals chantuns verda Maya Graf. Per ella è la refurma da las cassas da pensiun in element decisiv per las dunnas. Uschia vegnia serrada ina gronda largia tar las rentas per persunas che lavura a temp parzial e persunas cun in gudogn bass.
