La cassa da pensiun è – sper l'AVS ed il provediment privat – la segunda pitga dal provediment da vegliadetgna. Mintgin che gudogna dapli che 22'050 francs l'onn e ch'è sur 25 onns sto pajar. Era ils patruns da lavur pajan lur part. La finamira è che mintga persuna po suenter la pensiun mantegnair ses standard da viver.
L'idea da la cassa da pensiun è che mintgin e mintgina paja en per sasez – auter che tar l'AVS nua che tuts pajan en per tuts. Tschertas cassas ston dentant nizzegiar ils raps da persunas che n'èn anc betg en pensiun per pajar or las contribuziuns – simplamain perquai che la glieud viva pli ditg e survegn uschia er dapli daners sco er perquai che las cassas da pensiun fan damain gudogns sin ils martgads da finanzas. Quai n'è dentant betg l'idea da la segunda pitga. Cun quai che nossa societad vegn adina pli veglia, è la finanziaziun en privel.
La refurma pertutga surtut cassas da pensiun che pajan be il minimum obligatoric ch'è prescrit en la lescha. La gronda part da la populaziun survegn dapli – ella n'è pia betg pertutgada da la refurma. Er persunas ch'èn gia en pensiun na pertutga la refurma betg.
Cun questa refurma vulan ils aderents e las aderentas segirar la finanziaziun da la segunda pitga. Plinavant vegniss la cassa da pensiun accessibla per dapli persunas. Era la finanziaziun da contribuziuns da renta cun daners da persunas anc betg pensiunadas pudessan las cassas uschia evitar.
Fatg il referendum cunter la refurma han plirs sindicats, sco er la Partida socialdemocratica. Era il magasin da consuments «K-Tipp» e la partida Verda han sustegnì il referendum. Els discurran da «cugliunaria».
Il Cussegl federal sco er il parlament recumondan da dir Gea a la refurma. Il Cussegl naziunal è s'exprimì cun 113 cunter 69 vuschs tar 15 abstenziuns per la refurma. Il Cussegl dals chantuns ha ditg cun 29 cunter 8 vuschs tar 5 abstenziuns Gea a la refurma.
