Trend ad in Na a la refurma da las cassas da pensiun
La refurma ha pers il sustegn dal cumenzament en il decurs da la campagna ils davos mais. La fin d’avust è ina maioritad stgarsa da 51% s’exprimida cunter la refurma da las cassas da pensiun, ed ina cumpart da 42% per. La furmaziun da l’opiniun valitescha l'institut Gfs Berna uschia, che l'intenziun da vuschar possia vinavant anc sa midar.
Sch'ins dat in sguard sin las partidas, derivan las posiziuns cleramain cunter la refurma dals verds, da persunas ch'èn datiers dals socialdemocrats e da persunas betg liadas cun ina partida. Persuenter èn ils electurs e las electuras verdliberalas, dal center e dals liberaldemocrats. Tar la partida populara è èn las opiniuns divididas - ina part sustegna la refurma, l'autra è cunter.
La nova retschertga mussa era, che las dunnas èn uss in zic pli cler cunter la refurma che umens. E las persunas sut 40 onns han da tut las gruppas da vegliadetgna anc la pli ferma simpatia per las midadas areguard las cassas da pensiun.
Era l’iniziativa da biodiversitad pudess far naufragi
Da l’emprima tar la segunda retschertga han las intenziuns da vuschar mussà in trend vers in Na, tipic per iniziativas. La fin d’avust avessan anc 46% da las dumandadas e dals dumandads ditg segir u plitost Gea a l’iniziativa, cunter ina maioritad da 51% Na. E sulet an 3% sa mussan indecis, sco els u ellas vulan vuschar.
L’iniziativa vegn en emprima lingia sustegnida respectivamain refusada tenor la posiziun politica. Cuntinuant e cler è il sustegn dals aderents da la partida socialdemocratica e dals verds. E sustegn ha l’iniziativa vinavant era tar ils verdliberals. Tar ils aderents dal center politic resta la maioritad da Na stabila. Ed in cler trend da Na è sa sviluppà tar las persunas che sa posiziuneschan datiers dals liberals e da la partida populara.
Co il trend vers duas giadas Na è da vesair
Il trend vers in Na per la refurma da las cassas da pensiun saja in cas excepziunal per ina fatschenta che vegn da la regenza, constatescha l'institut Gfs en la retschertga. Auter che usità na saja da constatar nagina avischinaziun dals plans co vuschar a la posiziun dal parlament e dal Cussegl federal. D'ina vart saja la fatschenta cumplexa e glieud saja malsegira en vista a las cifras communitgadas ed a las consequenzas da la refurma. Vitiers vegnia la tema da rentas pli bassas. Da quellas avertescha il champ dals adversaris e quest avertiment fa ternor Gfs effect en il cumbat da votaziun. Quai ha manà ad ina reducziun da la cumpart da Gea en il decurs da la campagna politica.
En la debatta davart l'iniziativa da biodiversitad sa mussa bain ina ferma sensibilisaziun da la populaziun per ils gronds problems da l'ambient che spetgan la Svizra. Tuttina n'èsi betg gartegià avunda als aderents ed a las aderentas – da francar l'iniziativa tar ina maioritad e d'uschia mobilisar votantas e votants per l'iniziativa. Anzi regia l'impressiun che la Confederaziun ed ils chantuns fetschian gia avunda e che dapli mesiras na sajan betg necessarias. Perquai spetga l'institut Gfs Berna sco scenari realistic in Na a l'iniziativa da biodiversitad ils 22 da settember 2024.