En in'intervista cun «Le Matin Dimanche» ha ella ditg ch’i saja dal tuttafatg fauss da destruir la natira e da pretender dad uschia salvar ella. Indriz solars na vegnan simplamain mess sin in prau. I dovria construcziuns e fundament, che stoppian er vegnir construì. Enstagl da destruir patrimoni cultural stoppian ins l'emprim spargnar energia e meter indriz da fotovoltaica sin edifizis existents, uschia Vera Weber.
Plinavant crititgescha ella ch'i vegn stgaffì ina lescha urgenta, che cuntradia a las leschas da protecziun da natira e da planisaziun da spazi.
Critica envers ils parcs hai er gia dà da l'Organisaziun svizra da la protecziun da cuntrada. Er quell'organisaziun vesa il potenzial per energia solara surtut sin bajetgs existents. La Fundaziun per la protecziun vegnia dentant a sustegnair projects solars cumportabels per la cuntrada.
Opposiziun cunter projects planisads
Tenor la presidenta da la fundaziun Franz Weber na saja betg conscient a las autoritads, quant grond che l'opposiziun encunter parcs planisads è. In exempel saja in indriz da test en il Vallais sin 2'500 meters sur mar. Entaifer curt temp haja sa fundà ina gruppa dad adversaris cun passa 600 persunas.
Adattà al tema
Actualmain datti en differents chantuns iniziativas e projects per gronds parcs solars. In motiv perquai èn tranter auter las premissas pli bassas da la Confederaziun per bajegiar indrizs solars. In da quels projects è planisà a Scuol.
