La crisa d’energia actuala ha intimà las Ovras electricas d’Engiadina da lantschar in project per realisar in implant fotovoltaic a Scuol, suenter ch’il Cussegl federal ha relaschà ina lescha correspundenta che promova projects sumegliants.
Implant per 30'000 chasadas
A Scuol duai vegnir bajegià in dals pli gronds implants solars en Svizra. Il project previs ha ina dimensiun da maximalmain 35 hectaras e pudess producir electricitad per radund 30'000 chasadas, ha ditg Heinz Gross, commember da la direcziun da las Ovras electricas d'Engiadina (OEE). Previs fiss da construir quel sin la spunda sulegliva sut il Piz Champatsch en la vischinanza da las pendicularas Motta Naluns. Tenor Heinz Gross sa tracti d'in lieu ideal, betg visibel davent da la val, en ina zona betg privlusa da lavinas, plinavant fitg bain cuntanschibel.
Sustegn da tut las varts
La radunanza da burgais da Scuol ed er la suprastanza communala han dà glisch verda per il project. Heinz Gross è fitg cuntent cun il resun positiv, el saja surprais dal grond sustegn.
I para dad esser qua ina tscherta euforia per implants solars.
Ussa possian las Ovras electricas d'Engiadina cumenzar cun plans ed in studi da la factibilitad. Els sajan sut in tschert squitsch dal temp. Per pudair profitar da la lescha federala duai il project numnadamain vegnir realisà fin ils 2025.
Suenter il Gea da la radunanza da burgais da Scuol e suprastanza communala sajan anc necessaris ulteriurs pass politics per pudair realisar il projects. Quels na duain dentant betg franar il tal project, di il president communal da Scuol Christian Fanzun.
Er las pendicularas da la Motta Naluns vesan l'implant solar sco ina gronda schanza. I fiss positiv, sch'ils skiunzs e las skiunzas vesessan da nua che la forza electrica vegnia, di il directur da las Pendicularas Andri Poo. Il project na saja dentant betg mo ina schanza per l'Image da las pendicularas, ma pudess er avair avantatgs economics en furma d'electricitad pli bunmartgada.
