Sco la societad simpla ha scrit sin dumonda da RTR vegnan ils emprims resultats da las examinaziuns preschentads ils 4 da matg al cussegl da vischnanca da Mustér cun la dumonda da credit per las lavurs. Terminadas duajan quellas lavurs alura esser sin l’october. Anc il november duai in'ulteriura radunanza extraordinaria da la societad simpla approvar il contract da realisaziun cun ina interpresa, fin uss anc betg enconuschenta. Silsuenter possia la dumonda da construcziun vegnir inoltrada.
In dals gronds implants solaras en il chantun
La societad simpla «Alp Run Mustér» e la vischnanca da Mustér en collavuraziun cun la Solalpine examineschan sch'i fiss pussaivel da realisar in indriz fotovoltaic pli grond en il spazi autalpin sin l'Alp Run. Quest project sa numna «SOLAR ALPIN MUSTÉR». La firma Fanzun SA ha elavurà per incumbensa da l'IG Solalpine (la cuminanza d'interess per current solar d'enviern or da las alps) ina survista da lieus pussaivels per in indriz fotovoltaic en il chantun Grischun. Uschia han els concludì che l'Alp Run vegniss forsa en dumonda per in indriz grond da 36 hectaras.
Or da quest motiv e perquai ch'i vegn l'enviern adina pli stgars cun l'energia, ha la societad simpla Alp Run ensemen cun la Solalpine dumandà per offertas per in'examinaziun da quest lieu. La firma Fanzun SA da Cuira vegn a far l'exploraziun (fasa 1) ed il svilup dal project (fasa 2) da questa examinaziun.
La societad simpla Alp Run ha era dumandà la vischnanca per sustegn. Lezza vegn a surpigliar ils custs per l'emprima fasa da l'examinaziun.
Grondezza da 36 hectaras
L'indriz fotovoltaic duai vegnir planisà en la part sura da l'Alp Run sin ina surfatscha da 36 hectaras, quai èn radund 4% da l'entira surfatscha da l'alp. Tenor Guido Huonder, l'administratur da la societad simpla Alp Run, na vegnia il manaschi d'alp betg periclità. La societad simpla Alp Run Mustér che cumpiglia 18 proprietaris da dretg d'alp posseda l'Alp Run Mustér. Il territori da l'Alp Run ha ina surfatscha da 7,8 kilometers quadrats e sa chatta en il nord da la vischnanca Mustér.
La surfatscha è cumparegliabla cun l'indriz planisà a Scuol che produciss electricitad per radund 30'000 chasadas, e cleramain en in'autra dimensiun che quella da las ovras planisadas en la val Tujetsch.
La Solalpine è ina uniun independenta
La gruppa d’interess «Solalpine» è sa furmada avant radund in onn cun l’idea da promover ovras solaras e surtut da schliar il problem da la mancanza d’electricitad durant l’enviern, di Urs Simeon in dals suprastants da l’uniun. Cun la lescha urgenta dal Cussegl federal che simplifitgescha la realisaziun da grondas ovras solaras alpinas saja uss vegnì moviment en chaussa ed els hajan examinà en l’entira Svizra dapli che 100 lieus adattads. Era en il Grischun hajan ins examinà rodund 35 lieus pussaivels ed 15 da quels sajan en l’examinaziun pli detagliada, di Simeon ch’è partenari da l’interpresa Fanzun.
Ma l’uniun na vul betg realisar las ovras e manar ellas. Els vulan surtut examinar las pussaivladads e schanzas economicas, sco era la realisabilitad tecnica. Suenter surpiglia ina da las interpresas partenarias da Solalpine la realisaziun dal project accentuescha Urs Simeon. Il proxim temp vegnian els anc a preschentar plirs projects en l’entira Svizra ed era en il chantun Grischun, perquai ch'il temp per realisar las ovras cun survegnir in sustegn da la Confederaziun scada la fin 2025. Qua spera la IG Solalpine che la politica realisescha l’impurtanza da tals projects e prolunghescha eventual quel termin.
