La situaziun saja oz in autra, hai num tant dal president communal da Trun sco dal president communal da Luzein. Els na sa laschan betg decuraschar.
Trun – energia per radund 140 chasadas
Il rempar da Punteglias protegia il vitg da Trun cunter lavinas, bovas ed auas. Sin quest rempar duai vegnir installà in’implant fotovoltaic. La suprastanza ha inoltrà in preproject a l’uffizi per svilup da territori dal Grischun.
La resposta è vegnida il schaner: Or da vista dal chantun na possia l’idea betg vegnir sustegnida – tranter auter perquai ch’il rempar sa chattia en ina zona agricula. Plinavant disfigureschia l’implant la cuntrada, i dettia resalvas pervia da l’aua e forsa disturbia l’implant era ils utschels-mezmieur a Caltgadira.
Nus essan stads surstads da la resposta dal chantun
Tuttina saja la suprastanza da Trun persvadida da l’idea, di Dumeni Tomaschett. Il president communal fa attent che la resposta dal chantun tunass oz probabel auter ch’avant in onn. Perquai na less el betg ceder, tant pli ch’el survegn era resuns encuraschants da la populaziun.
Il proxim pass saja uss dad installar ina gruppa ch’elavuria in plan pli detaglià per l’implant solar sin il rempar da Punteglias, in plan che possia era persvader il chantun.
Dal reminent: La finanziaziun per l’implant solar na fiss nagin problem. Trun posseda participaziuns vi da l’Ovra electrica Rain Anteriur. Il retgav da questas participaziuns è creschì considerablamain.
Luzein – energia per var 600 chasadas
Avant 10 onns ha St. Antönien, oz fusiunà cun Luzein, cumenzà a planisar in implant solar sin las lavineras al Chüenihorn. Las medias en l’entira Svizra han rapportà, pertge per lez temp sa tractavia da plans visiunaris.
Il 2015 ha la radunanza communala dentant refusà da surpigliar la finanziaziun restanta per l’implant solar. Suenter han las ovras electricas da Turitg (EKZ) fatg ina segunda emprova. Ma la finala han era lezzas disditg pervi da la rentabilitad. Ins avess numnadamain anc stuì construir ina lingia per transportar l’energia.
Lezza giada han ins manchentà ina gronda schanza.
El haja survegnì bleras dumondas da puspè prender ils vegls plans or da truclet, di il president da Luzein. Cun il pretsch d’energia dad oz vesian las calculaziuns da rentabilitad ora auter, di Jann Flütsch, anteriur president da St. Antönien. El è persvadì ch’ins producescha in di energia solara al Chüenihorn.
