Avant in onn èn sa radunadas ina quarantina da persunas a Turitg per concretisar ideas per sustegnair la diaspora rumantscha. «Per nus è l'emprim creaton stà in success», di Barbla Etter, co-presidenta da la Pro Svizra Rumantscha. L'emprim creaton è vegni organisà dad els. Per la segunda ediziun ch'è ils 19 schaner è era la Lia Rumantscha participada a l'organisaziun.
Nus na vulain nagins chastès en l'aria. Nus vulain projects che vegnan realisads.
Impressiuns dal creaton 2024
-
Bild 1 von 5Legenda: Tenor Barbla Etter (entamez) è l'emprim creaton stà in success. Martin Cantieni -
Bild 2 von 5Legenda: En tut èn stadas preschentas enturn 40 persunas. Martin Cantieni
-
Bild 3 von 5Legenda: Ensemen han quellas sviluppà projects per la diaspora rumantscha. Martin Cantieni
-
Bild 4 von 5Legenda: Ils megliers projects èn vegnids premiads e pli tard era sviluppads vinavant ed inoltrads a l'Uffizi federal da cultura. Martin Cantieni
-
Bild 5 von 5Legenda: La proxima ediziun dal creaton è ils 19 schaner a Berna. Martin Cantieni
Projects concrets
Per las organisaturas èsi impurtant che il creaton po metter en pe projects concrets. Uschia datti questa stad per exempel in festival da cultura rumantscha a Turitg «il festivalet». Il project sco tal è vegnì concretisà al creaton da l'onn passà. Il creaton duai dar la plattafurma per sviluppar ideas ed era dar sustegn per cuntinuar cun quellas. «La finamira è ch'ils projects vegnan inoltrads a l'Uffizi federal da cultura», declera barbla Etter. La Confederaziun metta a disposiziun 400'000 francs per la diaspora rumantscha. Per survegnir quels dovri projects che persvadan.
Ideas ston persvader
En tut vegnan premiads al creaton maximalmain trais cun 4000 francs. Dentant vul il creaton era porscher maun ad iniziantas ed iniziants da projects cun colloquis suenter il creaton. Inputs dad expertas ed experts duain sustegnair ils projects durant la concretisaziun. Finamira è che las ideas persvadan l'Uffizi federal da cultura per uschia pudair realisar ellas cun sustegn finanzial.
Da Turitg a Berna
L'onn passà è l'occurenza stada a Turitg. «Quest onn avain decidì dad ir a Berna cun la speranza ch'era rumantschas e rumantschs che vivan en la Svizra franzosa sa participeschan», di Barbla Etter, la co-presidenta da la Pro Svizra Rumantscha. In idea saja da midar lieu per far il creaton onn per onn per cuntanscher tut las regiuns en Svizra nua che rumantschas e rumantschs en da chasa. Barbla Etter intuna che mintgina e mintgin è bainvegnì. Era sch'ins n'ha betg in'idea concreta possian ins vegnir a far in brainstorming per ideas dad auters. Ideas ed inputs pon era vegnir inoltradas ordavant sin la pagina d'internet da la Pro Svizra Rumantscha.