L’emprim creaton rumantsch. Quai sveglia marveglias. Creaton, tuna in zic sco hackaton, quels events nua che differentas persunas vegnan ensemen, programmadras, spezialists d'informatica ed auters per sviluppar entaifer in u dus dis novs programs.
Gist quai saja era l'idea dal creaton, di Clau Dermont da l’Uffizi federal da cultura ch'organisescha ensemen cun l'uniun Pro Svizra Rumantscha questa sonda in tal a Turitg.
Qua na vai en emprima lingia betg per la digitalisaziun mabain per crear ideas. Tuttina in zic in maraton perquai che la glieud vegn ensemen e la saira vulain nus avair resultats.
Resultats vul dir sviluppar ideas co sustegnair famiglias, uffants e persunas giuvnas en la diaspora rumantscha per ch'i possian viver e mantegnair lur ragischs rumantschas.
Intginas propostas sajan gia d’enturn. Per exempel da stgaffir ina sort ambassada rumantscha en la Bassa, organisar barats da cudeschs rumantschs u instradar in portal cun chanzuns u auter material rumantsch.
Ramassar persunas per ideas creativas
Per els saja fitg impurtant da far quai inscunter en ina furma nova, innovativa. La finamira saja da reunir las pli differentas persunas, era da quellas che n’han uschiglio da far pauc cun las instituziuns rumantschas sco la Lia Rumantscha, di Clau Dermont.
«Oz vesain nus ch’igl è grev da liar persunas en uniuns e suprastanzas nua ch’ins è lià per blers onns. La glieud è forsa pli interessada da lavurar en projects, da contribuir ad ideas. Forsa n’han ellas betg las capacitads u era il temp per surpigliar la responsabladad. Quai di duai esser la schanza da vegnir ensemen cun persunas e forsa che ina u l’autra survegn gust da far dapli u po sustegnair ina chaussa ed insatgi auter surpiglia lura da vairamain realisar quest project.»
I na duai pia betg mo restar tar ina rimnada d'ideas. E perquai vegn la fin dal di ina giuria a valitar quellas ideas e trais survegnan enfin 5'000 francs per silsuenter elavurar in concept detaglià che duai lura vegnir inoltrà a l’Uffizi federal da cultura, di Clau Dermont.
«Vul dir: I dat anc dapli daners sche in concept vegn realisà ed inoltrà uschia ch’ins po sustegnair quest project a pli lunga vista.»
Ed il creaton para propi da svegliar interess. Els hajan gia passa 30 annunzias, tradescha Dermont. E tgi che haja gust possia anc adina s'annunziar per l’inscunter da questa sonda a Turitg. Dapli che vegnian e pli interessant ch'i vegnia, è el persvadì.
