I para particular: dus deputads, ch'han notabene nums rumantschs, s’engaschan per ina lingua ch’els na discurran betg. Flurin Capaul (PLD) e Marco Denoth (PS) han fatg ina dumonda al cussegl da la citad da Turitg davart il rumantsch en la citad a la Limmat.
Tge fa Turitg per sia populaziun rumantscha? Quai vulain nus savair.
Motivà era senza discurrer la lingua
Flurin Capaul è creschì si a Turitg, ses tat era da Lumbrein. Auter ch'in curs intensiv da sursilvan n’ha el betg emprais la lingua. Il medem vala per Marco Denoth, ch’è dentant creschì si a Cuira. Er el na discurra betg ses idiom, il vallader, chapescha dentant il rumantsch. I na saja betg pervi da nauscha conscienza, ch’ins s’engascha per il rumantsch, èn ils deputads d’accord. Il rumantsch duai survegnir la preschientscha meritada.
Ins po maridar a Turitg per englais, pertge betg per rumantsch?
Ils deputads vulan s’engaschar per las pitschnas chaussas, che fetschian en la summa ina differenza: chartas per novs abitants, chalenders da rument u nozzas civilas per be numnar intginas ideas.
L’emprim pass è fatg
La dumonda vul savair dal cussegl da la citad quantas rumantschas e rumantschs che vivan a Turitg, co che quels sa dividan en ils differents idioms, tge che la citad porscha per sia populaziun rumantscha e co ch’ella vul mantegnair la cultura e lingua rumantscha. Enfin ils 28 da matg ha il cussegl temp. Sin basa da la resposta vulan Flurin Capaul e Marco Denoth decider tge incumbensa che duai seguir.
