Custs creschan ad in crescher
Taglia sin la plivalur crescha
Il consum en Svizra vegn puspè pli char. A partir dal prim da schaner valan las novas tariffas da la taglia sin la plivalur en Svizra. Tuttas creschan levet. Il pli fitg crescha la taglia sin la plivalur ordinaria che vala per rauba e servetschs, quella crescha da 7,7 sin 8,1%. La tariffa reducida che vala per exempel en ustarias sco er la tariffa speziala che vala per restar sur notg e ensolver creschan mintgamai per 0,1%.
Ils daners che la Confederaziun generescha cun quest augment van en il fond da gulivaziun da l'Assicuranza per vegls e survivents (AVS). La raschun per l'augment è la refurma da l'AVS 21 ch'il suveran ha approvà a l'urna.
Credits: Tschains creschan
Far in viadi, cumprar in auto u investir en ina chara furmaziun supplementara? Tgi che dovra per far quai in credit pitschen (da fin 80'000 francs) sto quintar cun pli auts tschains. Ils tschains maximals creschan numnadamain per 1 punct procentual sin 12%.
Electricitad daventa pli chara
18% u 220 francs dapli paja ina chasada svizra en media il 2024 per l'energia. Il sigl saja per l'ina perquai ch'ils pretschs dal 2023 èn anc vegnids avant ch'ils pretschs d'energia èn creschids en l'entira Europa. Pia è l'augment per l'ina ina consequenza da la situaziun europeica. Per l'autra vegnan er ils custs per las ovras d'electricitad da reserva uss mess en quint.
La Posta: Brevs e pacs custan dapli
Trametter ina brev da standard cun posta A u B custa mintgamai 10 raps dapli (1,20 franc e 1,00 franc). Trametter in pac da fin 2 kilogramms custa da nov 8,50 francs, enstagl fin uss 7 francs.
Protecziun civila: Medem sold sco en militar
Tgi che fa protecziun civila survegn il medem sold sco en il militar. Dapi il november 2022 deva quai ina pitschna differenza ch'è entant schliada. Da nov survegnan tant recruts da l'armada sco era tgi che fa protecziun civila 6 francs per di. La midada munta a custs supplementars da 1,3 milliuns francs per onn. Quels custs surpiglian ils chantuns.
Augment tar prestaziuns da sanadad
Cancer dal sain e dals ovaris
La Confederaziun vul meglierar la profilaxa da cancer dal sain e cancer dals ovaris, en spezial per dunnas ch'èn fitg periclitadas. A quellas paja da nov la cassa obligatorica per la tgira da malsauns da laschar prender davent il sain u ils ovaris.
Premias da las cassas da malsauns
La premias che Svizras e Svizzers pajan il 2024 per las cassas da malsauns èn 8,7% pli autas ch'anc il 2023. Quest augment è uschè grond sco dapi passa 10 onns betg pli.
Assicuranza sociala paja chauns d'assistenza
Persunas che pateschan dad epilepsia u dad autissem profiteschan da nov da dapli prestaziuns. Concret finanziescha l'assicuranza per invaliditad chauns ch'accumpognan uffants ch'han autissem enfin la vegliadetgna da 9 onns. Chauns ch'averteschan dad attatgas d'epilepsia paja l'assicuranza d'invaliditad per uffants e creschids. Ed il dretg sin in chaun da mobilitad vala da nov gia a partir da 16 onns enstagl da fin qua a partir da 18 onns.
Midadas che pertutgan il traffic sin via
Baiver alcohol e manischar l'auto
Vid la limita da 0,5 promils alcohol na sa mida nagut. Da nov survegn la polizia però dapli cumpetenzas. Dasper far tests da flad dastga la polizia da nov ordinar test da sang. Enfin uss stueva adina la procura publica dar la lubientscha. En pli datti tenor la lescha davart il traffic sin via da nov be pli en cas excepziunals ina controlla dal sang: per exempel tar suspect da drogas, medicaments u accidents.
E-bikes dovran tachometer
Tuts e-bikes cun assistenza da pedalas e che van fin a 45 km/h ston en il futur mesirar e mussar il tempo. La finamira è ch'er e-bikes duain resguardar las limitas da tempo. L'obligatori per in tachometer vala a partir dal prim d'avrigl per ils novs e-bikes svelts. Tgi ch'è gia en possess d'in e-bike po cumplettar quel cun in tacho aifer trais onns, scriva l'Uffizi federal da vias ASTRA.
Examen d'almain 45 minutas
Quant ditg ch'in examen per las categorias A e B cuzza è da nov reglà: Tgi che fa l'examen sto ir almain 45 minutas cun l'auto tras il traffic.
Era a fin per permiss en furma da palpiri blau
Dapi il 2003 datti il permiss d'ir cun auto en furma da carta da credit. Avant deva quai il permiss sin palpiri blau. La fin d'october perda quel sia valaivladad. Tgi ch'è anc en possess d'in vegl exemplar po barattar quel enfin lura tar l'Uffizi per il traffic sin via.