Ils pretschs d'energia per il 2024 sa midan. Uschia paja ina chasada en Val Alvra en media 432 francs per onn dapli (en tut 1358). Il pli aut pretsch pajan ins a San Vittore (1771 francs en media).
A Cuira ston ins pajar 25% dapli per l'electricitad, ed a Runcaglia/Rongellen er anc 14% dapli. Paucas vischnancas grischunas han pretschs pli bass, uschia Tavau cun 11% damain, e Medel/Lucmagn cun 6% damain.
En Svizra crescha il pretsch en media per var 18%, ins paja en media 32,14 raps per ura kilowatt. Per la chasada en media da la Svizra munta quai in augment da 220 francs, tar in consum da 4'500 uras kilowatt.
Plirs motivs per ils pretschs creschents
Influenzads èn ils pretschs tras la cumpart da l'atgna producziun dals singuls furniturs da forza electrica, e tras lur strategia da cumpra. Il sigl saja per l'ina chaschunà, perquai ch'ils pretschs dal 2023 èn anc vegnids avant ch'ils pretschs d'energia èn creschids en l'entira Europa. Pia è l'augment per l'ina ina consequenza da la situaziun europeica. Per l'autra vegnan er ils custs per las ovras d'electricitad da reserva uss mess en quint. Tranter auter èn quai ils custs per l'ovra da reserva a Birr (470 milliuns francs) ed ils custs per reservas en ovras idraulicas sur l'enviern (300 milliuns francs).
