L'assicuranza per invaliditad finanziescha da nov a partir dal 1. da schaner 2024 chauns accumpagnants per uffants autists fin 9 onns. Chauns ch'averteschan d'in'attatga d'epilepsia finanziescha l'AI per uffants e creschids. Tenor l'Uffizi federal da las segiradas socialas possibiliteschan quels animals a las persunas pertutgadas da viver ina vita pli autonoma.
Plinavant datti da nov in dretg sin chauns d’assistenza en cas d’in impediment da mobilitad gia a partir da 16 onns empè da sco fin ussa a partir da 18 onns. Per betg periclitar ils utilisadras e las utilisaders u terzas persunas e per garantir il bainstar dals chauns ston ils lieus da scolaziun esser certifitgads da l’organisaziun «Assistance Dog International».
Midadas sistem da pajament
Ultra da quai flexibilitescha la segirada d'invaliditad il sistem dals pajaments. Per servetschs d'interprets da lingua da segns per persunas surdas u transports a la plazza da lavur per persunas cun impediments datti il futur ina limita annuala enstagl dad ina mensila.
Chalzers ortopedics
L'assicuranza per vegls e survivents (AVS) paja da nov annualmain contribuziuns vi da chalzers ortopedics – enstagl sco fin ussa mintga dus onns. Uschia è la regulaziun da l'AVS eguala a quella da l'AI.
Cun questas ed ulteriuras adattaziuns ademplescha il Departament federal da l'intern – trais moziuns or dal parlament federal.