Las premias per la cassa da malsauns s'augmentan era il 2024. En il Grischun ston ins en media pajar 8,3% dapli. Concret munta quai che las premias medias van da radund 290 francs l'onn 2023, sin 314,50 francs il 2024. Tar las premias per uffants (0-18 onns) e per creschids sur 25 onns datti in augment da 7,4%. Per la gruppa tranter 18 e 25 onns vegni in zic pli char, là creschan las premias per 8,8%.
Pli autas premias muntan era pli auts custs per il chantun
Che las premias s’augmentan n’ha betg mo consequenzas per la populaziun, mabain era per il chantun. Quel sustegna persunas ch’han da bun ina reducziun da las premias. Mintg’onn retira circa in terz da la populaziun quest sustegn, l’onn passà èn quai stadas 65'000 persunas.
Il chantun e la Confederaziun han mess a disposiziun ensemen 105 milliuns francs. Per l’onn 2024 duess quest import vegnir augmentà sin 137 milliuns francs, ha ditg il minister da sanadad Peter Peyer envers RTR.Sche quai na tanscha betg, ha la regenza la pussibilitad d’auzar la summa senza stuair dumandar il Cussegl grond.
La situaziun svizra
L'augment svizzer è anc in zic pli grond, la media svizra è tar 8,7%. Quasut ina survista dals chantuns:
Il pli ferm augment datti en il Tessin – il pli pitschen a Basilea-Citad ed en l'Appenzell Dadens.
Motiv principal per l'augment èn ils custs pli auts
Dapli visitas tar medis e servetschs ambulants d'ospitals, sco era pli blers e pli chars medicaments chaschunian il ferm augment, communitgescha l'Uffizi federal da sanadad (BAG). Las entradas entras premias n'han il 2023 betg cuvert ils custs da las cassas da 35 milliardas francs. Quai è gia stà il 2022 uschia.
Il BAG declera il ferm augment, sper ils custs che creschan, cun l'auzament da 6,6% da premias che n'è betg arrivà tar las cassas da malsauns. Perquai che bleras persunas hajan midà cassa u auzà la franschisa, hajan las cassas be survegnì 5,4% dapli. Quella mancanza d'entradas en cumbinaziun cun ils custs pli auts chaschunia il ferm auzament il 2024.
Las reservas èn sa reducidas
In ulteriur effect han las consequenzas da la pandemia. Il 2022 hai dà ina perdita da 1,7 milliardas francs tar las cassas, entras la cumpensaziun d'effects da la pandemia. Ulteriuras 1,8 milliardas èn idas a perder al martgà da chapital. Quellas perditas pon las cassas pajar cun las reservas. Quellas èn sa sminuidas en l'entira branscha sin 8,5 milliardas, tge ch'è avunda, na tanscha dentant betg per mitigiar il svilup da premias.
Or da l'archiv
