Dapi la pandemia da corona sajan ils cas da violenza envers il persunal da l’Ospital chantunal dal Grischun a Cuira sa dublads. L'onn 2024 haja dà 140 cas da violenza, di il schefmedi da medischina d’urgenza Thomas Müller. Questa violenza po sa mussar en furma verbala – cun blastemmas, insultas e smanatschas – u er en furma fisica, cun strair per ils chavels, stumplar fin a schleppas e schizunt pugns. Era violenza sexuala vegnia avant.
Dapi la pandemia da Corona èn ils cas sa dublads.
Per proteger il persunal che lavura di per di sin la staziun d’urgenza, porscha l'ospital differentas scolaziuns e curs. En quels emprendan las collavuraturas ed ils collavuraturs co ir enturn cun situaziuns difficilas. Qua vai en emprima lingia per emprender co sa depurtar en situaziuns cun potenzial d’escalaziun. Cun il dretg cumportament pon ins en il meglier cas deescalar ina situaziun u insumma guardar d'evitar in'escalaziun.
Per mai èsi fitg impurtant, che mes collavuraturs n'èn sche pussaivel betg exposts a violenza.
Per situaziuns nua che tut las mesiras da precauziun n'han betg gidà ed i dat in privel d’ina escalaziun, datti il team da security intern. Quel po mintga collavuratura e mintga collavuratur da l’ospital clamar sur in buttun d’urgenza. Els vegnan per regla clamads sche pazients smanatschan da duvrar violenza. En l’onn 2024 è quest buttun d’urgenza vegnì smatgà 76 giadas per clamar il security intern.
Sche pazients daventan effectivamain violents envers il persunal da l’ospital, alura vegn clamada la polizia.
Nus persequitain dapi onns ina toleranza nulla envers violaziun.
Ils collavuraturs e las collavuraturas da l’ospital èn obligads d'annunziar mintga cas da violenza ad in post intern. Uschia pon ins per l'ina tegnair la survista da la situaziun actuala, ma il pli impurtant saja quai per il persunal, manegia Thomas Müller. Situaziuns da violenza al lieu da lavur van a cor e chaschunan malsegirezzas u era temas tar ils pertutgads. Il post intern po suenter in'annunzia prender si contact cun la collavuratura u il collavuratur, per alura far in discurs nua ch'ils collavuraturs pon parter lur experientscha. En singuls cas dettia er accumpagnament psicologic, per part – sche necessari – era sur pli lung temp.
A nus è quai fitg impurtant che quests cas vegnan annunziads.
Che pazients daventian violents envers il persunal che vul ensasez be gidar, haja savens da far cun la situaziun generala dals pazients. Sper substanzas sco alcohol, drogas e problems psichics che pon augmentar il ristg d'ina escalaziun dettia er auters facturs: Savens èn persunas en la staziun d’urgenza stressadas, ellas hajan savens tema e sa sentian malsegiras. Ultra a quai dettia savens lungs temps da spetga sch'auters pazients han chaussas pli acutas. Tut quai contribueschia ad ina situaziun extraordinaria nua che las retegnientschas da daventar violent daventian pli pitschnas.
Thomas Müller di, ch'i saja difficil da chattar ina resposta concreta sin la dumonda daco che la violenza arrivia. I dettia blers facturs che giogan ina rolla. Thomas Müller manegia, ch'il problem giaja sur la staziun d'urgenza ora: La criminalitad haja dapertut. La violenza che crescha saja in problem general che sa mussa dentant en tscherts lieus pli fitg ch'en auters. Per glieud che lavura sin la staziun d’urgenza èsi ina realitad ch'els vesan e badan mintga di.