Circa 25 onns maina Uwe Päper fingia curs da cumbat e defensiun. L’emprim en Germania – ed ussa dapi in pèr onns a Cuira. El ha in'atgna scola, nua ch'el mussa a ses scolars e sias scolaras differentas furmas da cumbat sco Escrima e Wing Tsun. El ha gia en il passà dà ina pluna curs a glieud che lavura en la tgira – en ospitals ed instituziuns sumegliantas.
En sasez na fetschia el betg ina differenza en il trenament da persunal d'ospital. Ma el manegia ch'i dettia in punct da tegnair endament per uschè in curs. Glieud che lavura en il sectur da sanadad u tgira veglia en emprima lingia gidar. Els sajan fitg focusads sin far insatge dal bun per lur conumans. Sch'els vegnian alura attatgads d’in pazient u d’ina pazienta, lura saja quai savens in mument che surdumondia. Tge è uss la dretga reacziun? Uwe Päper manegia che talas situaziuns fetschian savens ponderar e metter en dumonda l’atgna professiunalitad.
Jau stoss l'emprim fixar, nua ch'il cunfin è per mai.
Perquai di el ch'ils emprims pass dad in curs dad autodefensiun na sajan betg emprender a dar ils dretgs pugns, mabain cun badar, nua ch'ils agens cunfins èn. Ed alura saja impurtant d'elavurar la fidanza en sasez. Quai veglia dir emprender in bun sentiment dal corp, ina buna balantscha, pudair duvrar la mimica, la gestica e la vusch.
Cumbatter vul l'emprim dir: cuntanscher forza interna.
Plinavant vai per emprender da duvrar l’atgna forza e savair danunder prender ella e co cumbatter il pli effectiv. Alura possian ins perfecziunar las tecnicas e daventar adina meglier. Uwe Päper manegia che giugar situaziuns funcziunalas cun partenaris gida per survegnir in sentiment per talas situaziuns. La finamira è dad avair ina tscherta calma e – sche pussaivel – schliar conflicts senza violenza. E tuttina mussa el a scolaras e scolars, co ch'els pon ferir insatgi, uschia che quel n'è betg pli buns d’attatgar. Uwe Päper manegia che, sche insatgi sappia ch'el saja abel da far quai, lura dettia quai segirezza. Questa savida da l’atgna abilitad fa che la persuna ha er ina preschientscha pli segira vers anora.